Իրանը կընտրի իր պատասխանը ՀԱՄԱՍ-ի առաջնորդի սպանությանը՝ անկախ տարածաշրջանում իր դաշնակիցներից

Իրանի իշխանությունները կորոշեն, թե ինչ պատասխան տան Իսրայելին Թեհրանում ՀԱՄԱՍ-ի քաղբյուրոյի ղեկավար Իսմայիլ Հանիեի սպանությանը տարածաշրջանում հակաիսրայելական մյուս ուժերից առանձին, հայտարարել է Իրանի զինված ուժերի գլխավոր շտաբի պետ Մոհամմադ Բաղերին: Նրա խոսքերը մեջբերում է Tasnim գործակալությունը։

«Իրանի Իսլամական Հանրապետությունն ինքը կորոշի ռեւանշի մասին, մինչդեռ Դիմադրության առանցքը այս ոլորտում գործում է առանձին և անկախ, ինչպես մենք տեսանք երեկ»,- ասել է նա։

Իրանի արտաքին գործերի նախարար Աբաս Արաքչին իր իտալացի գործընկեր Անտոնիո Թայանիի հետ հեռախոսազրույցում խոստացել է «անմիջական և ճշգրիտ հաշվարկված պատասխան» Հանիեի մահվանը։

Իրանի արտգործնախարարության խոսնակ Նասեր Քանանին կարծիք է հայտնել, որ տարածաշրջանում ուժերի ռազմավարական հավասարակշռությունը փոխվել է, և Իսրայելը կորցրել է սպառնալիքները զսպելու ունակությունը։ «Չնայած ԱՄՆ–ի նման պետությունների համապարփակ աջակցությանը, Իսրայելը չկարողացավ կանխատեսել դիմադրության ուժերի կողմից սահմանափակ և վերահսկվող գործողությունների ժամանակը և վայրը», - ասել է Քանանին:

Նախօրեին Իսրայելը լայնածավալ կանխարգելիչ հարված է հասցրել Լիբանանում «Հեզբոլլահի» դիրքերին։ «Հեզբոլլահը» հայտարարել է Իսրայելի ուղղությամբ 320 հրթիռների և տասնյակ անօդաչու թռչող սարքերի արձակման մասին։