«Կատաստրոֆիկ» նվազել է Կասպից ծովում ջրի մակարդակը. Ալիևը՝ Պուտինին

Ադրբեջանի նախագահ Իլհամ Ալիևը հայտարարել է Կասպից ծովում բնապահպանական ծայրահեղ ծանր վիճակի մասին։ Նա նշել է, որ ՌԴ նախագահին ցույց է տվել, թե որքան է ծանծաղացել աշխարհի ամենամեծ լիճը։ Ըստ Ալիևի՝ Կասպից ծովում ջրի մակարդակը «կատաստրոֆիկ նվազել է»։

«Մենք պայմանավորվել ենք վերլուծել և ինչպես երկկողմ, այնպես էլ հնգակողմ ֆորմատով ուղիներ մշակել՝ կանխելու հնարավոր էկոլոգիական աղետը։ Այդ աղետի դրսևորումները մենք արդեն անզեն աչքով տեսնում ենք»,- ասել է նա։

Ավելի վաղ Ադրբեջանն ու Ռուսաստանը փոխըմբռնման հուշագիր են ստորագրել կլիմայի փոփոխության և ցածր ածխածնի զարգացման հարցերի շուրջ:

Ռուսաստանն այս փուլում ակտիվ գործողություններ է ձեռնարկում մինչև 2060 թվականը ածխածնային չեզոքության հասնելու համար, Ադրբեջանը՝ մինչև 2030 թվականը ջերմոցային գազերի արտանետումները 35% -ով և մինչև 2050 թվականը՝ 40%-ով նվազեցնելու համար:

Հուշագիրը Ռուսաստանին և Ադրբեջանին թույլ կտա համատեղ կլիմայական նախագծեր և հետազոտություններ սկսել ջերմոցային գազերի կլանումը մեծացնելու և արդյունաբերական արտանետումները նվազեցնելու համար: Նոր փաստաթուղթը երկրներին թույլ կտա ներդնել ջերմոցային գազերի ցածր, զրոյական և բացասական արտանետումներով համատեղ տեխնոլոգիաներ, այդ թվում՝ ածխածնի որսման, օգտագործման և պահպանման, վերականգնվող և այլ ցածր արտանետումների էներգիայի աղբյուրների և ջրածնային տեխնոլոգիաներ:

Հուշագիրն ուժի մեջ է մտնում ստորագրման պահից և գործում է 5 տարի: Դրա իրականացման շրջանակներում Ռուսաստանը և Ադրբեջանը մտադիր են խորհրդակցություններ անցկացնել կլիմայի փոփոխության հարցերի շուրջ տարբեր երկկողմ և բազմակողմ հարթակներում, ներառյալ՝ Կլիմայի փոփոխության մասին ՄԱԿ-ի շրջանակային կոնվենցիան և ՄԱԿ-ի այլ հարթակները: