ԱՄՆ-ը նախազգուշացրել է Թուրքիային, որ երկրի համար «հետևանքներ» կլինեն․ FT

Վաշինգտոնը նախազգուշացրել է Թուրքիային, որ երկրի համար «հետևանքներ» կլինեն, եթե այն չդադարի ՌԴ արտահանել ամերիկյան ռազմական սարքավորումները, որոնք կենսական նշանակություն ունեն Մոսկվայի «պատերազմական մեքենայի» համար: Այս մասին գրում է Financial Times-ը:

Առևտրի նախարարի օգնական Մեթյու Աքսելրոդը, որը գլխավորում է ԱՄՆ-ի ջանքերը՝ զգայուն տեխնոլոգիաները Վաշինգտոնի հակառակորդների ձեռքից հեռու պահելու ուղղությամբ, վերջերս Անկարայում և Ստամբուլում հանդիպել է թուրք պաշտոնյաների և գործադիր տնօրենների հետ՝ ապօրինի առևտուրը դադարեցնելու ջանքերի շրջանակում: Նրա ուղերձը, ըստ առևտրի դեպարտամենտի բարձրաստիճան պաշտոնյայի, այն էր, որ Թուրքիան պետք է ավելի շատ աշխատի, որպեսզի դադարեցնի ՌԴ-ի համար Ուկրաինայում պատերազմի տեսանկյունից առանցքային համարվող ամերիկյան ծագման չիպերի և այլ մասերի առևտուրը:

Հրատարակության համաձայն՝ վերջերս Անկարա և Ստամբուլ կատարած այցի ժամանակ Աքսելրոդը դժգոհություն է հայտնել թուրքական իշխանություններից։ Աքսելրոդի պնդմամբ նրանք ներգրավված են ամերիկյան զգայուն տեխնոլոգիաները Ռուսաստանի Դաշնություն փոխանցելու մեջ՝ շրջանցելով ԱՄՆ արգելքը։

«Մեզ պետք է, որ Թուրքիան օգնի կանգնեցնել ԱՄՆ տեխնոլոգիաների ապօրինի հոսքը դեպի Ռուսաստան: Մենք պետք է արագ առաջընթաց տեսնենք թուրքական իշխանությունների և արդյունաբերության կողմից: Հակառակ դեպքում, մենք այլ ելք չենք ունենա, քան սահմանափակումներ դնել նրանց վրա, ովքեր շրջանցում են մեր արտահանման վերահսկողությունը», - ասել է Աքսելրոդը:

Նշվում է, որ ինչպես հայտնում են ամերիկացի պաշտոնյաները՝ ԱՄՆ Առևտրի նախարարությունը պատժամիջոցների ցանկում արդեն ավելացրել է 18 ընկերություն, որոնք ամերիկյան ապրանքներ են տեղափոխել Ռուսաստանի Դաշնություն, և ապագայում այդ ցուցակը կարող է ընդլայնվել, եթե Թուրքիայի կողմից «առաջընթաց չգրանցվի»: