Աշխարհի ամենադաժան և հզոր նարկոբարոններից մեկն է ձերբակալվել

Աշխարհի ամենահայտնի նարկոբարոններից մեկը՝ Իսմայել «էլ Մայո» Սամբադան՝ Մեքսիկական «Սինալոա» կարտելի առաջնորդը, ձերբակալվել է Տեխաս նահանգի Էլ Պասո քաղաքում:

76-ամյա Սամբադան կարտելը հիմնել է Խոակին «Էլ Չապո» Գուսմանի հետ, ով ներկայումս գտնվում է ամերիկյան բանտում:

Սամբադայի հետ միասին ձերբակալվել է Գուսմանի որդին՝ Խոակին Գուսման Լոպեսը, հայտնում է ԱՄՆ արդարադատության նախարարությունը:

Երկուսն էլ ձերբակալվել են Տեխասի մասնավոր օդանավակայաններից մեկում, հայտնում են ամերիկյան լրատվամիջոցները:

Մեքսիկացի նարկոբարոն էլ Չապոն ԱՄՆ-ում ցմահ ազատազրկման է դատապարտվել եւ եւս 30 տարվա ազատազրկման:

ԱՄՆ գլխավոր դատախազ մերիկ Գարլանդը նշել է, որ Սամբադան և Լոպեսը գլխավորում են «աշխարհի ամենադաժան և հզոր թմրակարտելներից մեկը»:

Փետրվարին ԱՄՆ իշխանությունները Սամբադային մեղադրեցին ֆենտանիլ պարունակող նյութ պատրաստելու և տարածելու դավադրության մեջ:

«Ֆենտանիլն ամենամահաբեր թմրադեղն է, որին երբեւէ բախվել է մեր երկիրը, եւ արդարադատության նախարարությունը չի հանգստանա, քանի դեռ կարտելի յուրաքանչյուր առաջնորդ, անդամ եւ հանցակից, որը մեղավոր է մեր քաղաքացիների թունավորման մեջ, պատասխանատվության չի ենթարկվի»,-հայտարարել է Գարլանդը: