Ֆրանսիայում ձախ դաշինքը հավակնում է կառավարություն ձևավորել. Der Spiegel
Ֆրանսիայի խորհրդարանական ընտրություններում անսպասելիորեն առաջատար դարձած ձախ դաշինքը հավակնում է կառավարություն կազմել։ Այս մասին հայտնում է Der Spiegel-ը։
«Մենք պատրաստ ենք կառավարել երկիրը», - ասել է Ժան-Լյուկ Մելանշոնը հեռուստատեսային տեսախցիկների առջև առաջին կանխատեսումից րոպեներ անց: Մելանշոնը ձախ պոպուլիստական La France Insoumise (LFI - Չնվաճված Ֆրանսիա) կուսակցության առաջնորդն է, որը ձախերի դաշինքի մաս է կազմում։
Մելանշոնը սուր քննադատության է ենթարկել նախագահ Էմանուել Մակրոնին և նրա կառավարության աշխատանքը։ Մակրոնը պետք է ընդունի իր պարտությունը, ասել է նա։ Ընտրությունները «հստակ հաստատեցին» դա։
Վարչապետ Գաբրիել Աթալն այժմ պետք է տեղ ազատի ձախերի դաշինքից մեկի համար: Ձախերը ցանկանում են իրականացնել իրենց ողջ ծրագիրը։
Այս երեկո Էմանուել Մակրոնը չի ցանկանում մեկնաբանություն անել։ Նախագահն այժմ վերլուծում է ընտրությունների արդյունքները և կսպասի «ամբողջական պատկերին», նախքան հաջորդ անհրաժեշտ որոշումները կայացնելը, հայտարարել է Ելիսեյան պալատը։
Ըստ հայտարարության` Ֆրանսիայի գործող նախագահը հարգելու է ֆրանսիացի ժողովրդի որոշումը։
