Ֆրանսիայի նախագահ Էմանուել Մակրոնի դաշնակիցները չեն ցանկանում ասոցացվել նրա հետ Ազգային ժողովի (Ֆրանսիայի խորհրդարանի ստորին պալատ) արտահերթ ընտրություններից առաջ քարոզարշավի շրջանակներում՝ վախենալով, որ դա բացասաբար կանդրադառնա վերընտրվելու իրենց շանսերի վրա: Այս մասին հայտնում է Politico թերթի եվրոպական հրատարակությունը։

Թերթի տեղեկություններով՝ անգամ նախագահի դաշնակիցները կառավարական կոալիցիայի կուսակցություններից Մակրոնին ավելի ու ավելի են ընկալում որպես «իրականության հետ կապը կորցրած եւ սեփական գրավչության վերաբերյալ մոլորված մարդու»:

Խորհրդարանի պատգամավորներից մեկը, որը մտնում է Ֆրանսիայի առաջնորդի կոալիցիայի մեջ, պարբերականին հայտարարել է, որ Մակրոնի նկարը չի տեղադրի իր նախընտրական պաստառների վրա: Մակրոնի «Վերածնունդ» կուսակցության խորհրդարանական խմբի անանուն ներկայացուցչի խոսքով՝ հանրապետության ղեկավարությունում «այնքան էլ չեն հասկանում Ֆրանսիայում տիրող հականախագահական տրամադրությունները»: Ելիսեյան պալատի անանուն նախկին աշխատակիցը Եվրախորհրդարանի ընտրություններից անմիջապես հետո արտահերթ խորհրդարանական ընտրություններ անցկացնելու պետության ղեկավարի որոշումն անվանել է «մարդու զառանցանք արարք, որին պարտությունը հունից հանել է»:

Պարբերականը նշում է, որ նախընտրական քարոզարշավի լույսի ներքո Մակրոնին աջակցող կոալիցիայի ներսում լարվածությունն այնքան է աճել, որ դաշինքի ազդեցիկ ներկայացուցիչները սկսել են նախագահին ստվեր գցելու կոչ անել: Անանուն ֆրանսիացի խորհրդարանականի խոսքով՝ պետության ղեկավարի առանցքային դաշնակից, արդարադատության նախկին նախարար Ֆրանսուա Բայրուն երկուշաբթի երեկոյան Ելիսեյան պալատում էր, որպեսզի հասկացնի, որ Մակրոնը «չպետք է շատ տարվի նախընտրական արշավով», ինչպես նաեւ պատգամավորների հետ քննարկել է «դեմոկրատացման» անհրաժեշտությունը: Ընդ որում, ինչպես նշում է թերթը, Մակրոնի կուսակցությունը երկար ժամանակ համարվում էր միայն նախագահի «շարունակությունը», որը չի կարող գոյություն ունենալ առանց նրա:

Պարբերականի տվյալներով՝ առաջին հարցումները ցույց են տալիս, որ «Վերածնունդը» կարող է պարտվել արտահերթ խորհրդարանական ընտրություններում։ Politico-ի գնահատմամբ՝ միանգամայն հնարավոր է, որ նախագահական կոալիցիան ֆրանսիական քաղաքականության մեջ դառնա միայն երրորդ ուժը՝ ծայրահեղ աջերից և ձախերից հետո:

«Որքան շատ է նա (Մակրոն-խմբ.) ասում է, այնքան շատ միավոր ենք կորցնում հարցումներում», - ասել է «Վերածնունդ» կուսակցության պատգամավորներից մեկի խորհրդականը։

Հունիսի 9 -ին Մակրոնը որոշում է կայացրել արձակել Ազգային ժողովը եւ արտահերթ ընտրություններ անցկացնել Եվրախորհրդարանի ընտրություններում իր կոալիցիայի պարտությունից հետո.այն հավաքել է ձայների 14,6 տոկոսը: Դա կիսով չափ քիչ է ընդդիմադիր աջակողմյան «Ազգային միավորում» կուսակցությունից, որին աջակցել է ընտրողների 31,4 տոկոսը։ Ազգային ժողովի արտահերթ ընտրությունների առաջին փուլը տեղի կունենա հունիսի 30 - ին, երկրորդը՝ հուլիսի 7-ին: Վերջին անգամ խորհրդարանի ստորին պալատը վաղաժամկետ լուծարվել է նախագահ Ժակ Շիրակի կողմից 1997 թվականին: