ՏԵՍԱՆՅՈՒԹ. Քենիայից ժամանած եղբայրները ձերբակալվել են 72 ժամով. փաստաբան

Քենիայից ժամանած եղբայրներ Արթուր և Արտակ Սարգսյանները (Arthur Brothers) Երևանի քննչական կոմիտեի քննիչի որոշմամբ 72-ժամյա ռեժիմով ձերբակալվեցին։ «Ֆեյսբուքի» իր էջում տեղեկությունը հայտնում է եղբայրների պաշտպան Արսեն Բաբայանը։

«Եղբայրները կասկածվում են ապօրինի զենք պահելու մեջ։ Նրանց մոտ չի հայտնաբերվել ո՛չ զենք, ու ո՛չ էլ որևէ ապօրինի առարկա»,- գրում է Բաբայանը։

Պաշտպանի խոսքով՝ ձերբակալումն ամբողջությամբ ապօրինի է և պայմանավորված է բացառապես «Սրբազան շարժմանը» նրանց մասնակցությամբ։

Նշենք, որ քիչ առաջ «Ազգային ճակատ» տելեգրամյան ալիքը տեսանյութ տարածեց, որտեղ երևում է, թե ինչպես է Ազգային անվտանգության ծառայությունը ձերբակալում եղբայրներին։ Նրանց պառկեցնում են ասֆալտին և ձեռնաշղթաներ հագցնում։