Զելենսկին բացատրել է, թե ինչու չի ուզում սառեցնել հակամարտությունը

Ուկրաինայի նախագահ Վլադիմիր Զելենսկին հայտարարել է, որ ապագայում Ռուսաստանի հետ հակամարտության սառեցման դեպքում այն անպայման նորից կբռնկվի։ Այս մասին գրում է բրիտանական The Guardian թերթը։

Ինչպես նշել է պետության ղեկավարը, սառեցված հակամարտությունը դանդաղ պատերազմ է իրենից ներկայացնում: Ընդ որում, նա ընդգծել է, որ ինչ-որ պահի կարող է առիթ լինել ռազմական գործողությունների ակտիվ փուլի վերսկսման համար:

«Կգա մի պահ, երբ այս ամենը այս կամ այն պատճառով կսառեցվի», — ընդգծել է Զելենսկին։

Նրա կարծիքով՝ ռազմական գործողությունների դադարը օգուտ կբերի Մոսկվային, բայց ոչ Կիևին։ Ռուսական կողմն այդ ժամանակը կծախսի, որպեսզի ուժեղացնի իր դիրքերը ռազմի դաշտում և հասկանա, թե ինչ ռեսուրսներ է պակասում իր բանակին։

«Մենք դա գիտենք։ Մենք ունենք նույն դեֆիցիտը, մենք այդ մասին խոսում ենք բաց», - հավելել Է Ուկրաինայի նախագահը։

Նա չի բացառել, որ հակամարտության սառեցման դեպքում ՌԴ զինված ուժերն էլ ավելի կուժեղանան։ Այդ ժամանակ Մոսկվան հիմք կունենա Կիևին բազմաթիվ պայմաններ առաջադրել, այդ թվում՝ ճանաչել տարածքների կորուստը և հրաժարվել ՆԱՏՕ-ին և Եվրամիությանը անդամակցելուց, ամփոփել է պետության ղեկավարը։

Մայիսի 25-ին Զելենսկին հայտնել է, որ մտադիր չէ պայմանավորվել Ռուսաստանի իշխանությունների հետ հրադադարի մասին։ Ուկրաինայի առաջնորդի խոսքով՝ նման համաձայնագիրն իմաստ կունենար միայն այն դեպքում, եթե երկու պետությունների զինծառայողները գտնվեին սահմանների գծում: