Վրաստանի նախագահին չէին հրավիրել Ոստիկանության օրվան նվիրված միջոցառմանը

Վրաստանի նախագահ Սալոմե Զուրաբիշվիլին մայիսի 31-ին ներկա չի եղել Ոստիկանության օրվան նվիրված միջոցառմանը, որին մասնակցում էին Վրաստանի իշխանությունների բարձրաստիճան ներկայացուցիչները, այդ թվում վարչապետ Իրակլի Կոբախիձեն, ներքին գործերի նախարար Վախթանգ Գոմելաուրին եւ այլ նախարարներ, տեղեկացրել է «Грузия Online»-ը։

Լուրերն այն մասին, թե նախագահին չէին հրավիրել արարողությանը, հաստատել է ներքին գործերի նախարարը՝ միջոցառումից հետո լրագրողներին հայտնելով, որ նախագահին չէին հրավիրել, քանի որ նա ներման է արժանացրել այն դատապարտյալին, որը «ողջ-ողջ» այրել է ոստիկանին։

Գոմելաուրին ասել է. «Մենք որոշեցինք չհրավիրել տիկին նախագահին, որպեսզի ոստիկանների հետ անհարմարություններ չծագեն»։ Հետո նա ասել է, որ նախագահը ներում է շնորհել «ոստիկանին սպանողին»։ Ենթադրաբար, նա նկատի ուներ Լազարե Գրիգորիադիսին, որը ձերբակալվել էր 2023թ. եւ դատապարտվել ինը տարվա ազատազրկման այն բանի համար, որ «Մոլոտովի կոկտեյլ» էր նետել ոստիկանի վրա «օտարերկրյա գործակալների» մասին օրենքի դեմ բողոքի ակցիայի ժամանակ։ Ավելի ուշ նախագահը ներում էր շնորհել Գրիգորիադիսին։

«Դու գիտե՞ք, թե ինչ որոշում է կայացրել տիկին նախագահը։ Ես կարծում եմ, որ մենք նրան անհարմար վիճակի մեջ չենք դրել եւ նորից հոգացել ենք տիկին նախագահի մասին»,- ասել է Գոմելաուրին։

«Ոչ մի սահմանադրական պարտավորություն չունեմ հրավիրելու նախագահին, ոչ էլ օրենքով նման պարտավորություն կա։ Չեմ կարող պատկերացնել, որ որեւէ երկրի նախագահ ներում կարող է շնորհել ոստիկանին սպանողին... Ուստի, որպեսզի անհարմարություններ չլինեն, այդ թվում եւ ոստիկանների հետ, մենք որոշեցինք չհրավիրել տիկին նախագահին»,- ավելացրել է նա։ Գոմելաուրիի խոսքով՝ միջոցառմանը հրավիրված էին բոլոր դեսպանները, սակայն տարբեր պատճառներով նրանք չեն կարողացել մասնակցել միջոցառմանը, եւ նրանց փոխարեն եկել են իրենց ներկայացուցիչները։

Մինչդեռ, երբ մայիսի 31-ին նախագահ Սալոմե Զուրաբիշվիլին զբոսնում էր թոռան հետ Կրիայի լճում, նրան են բախվել այսպես կոչված «տիտուշկաները»։ «Փիրվելի» հեռուստաալիքը տեղեկացրել է, համենայն դեպս՝ մի վկայի խոսքով, որ նրանց ձեռքերին մահակներ եւ փայտեր կային, եւ նրանք բղավում ու վիրավորում էին նախագահին։