Գազայում մշտական հրադադար չի լինի, քանի դեռ չի ոչնչացվել ՀԱՄԱՍ-ի պոտենցիալը. Նեթանյահու
Իսրայելի վարչապետ Բենիամին Նեթանյահուն շաբաթ օրը հայտնել է, որ Գազայում մշտական հրադադար չի լինի, այնքան ժամանակ, մինչեւ որ ոչնչացվի ՀԱՄԱՍ-ի ռազմական եւ կառավարչական պոտենցիալը, տեղեկացրել է Reuters-ը։
«Իսրայելի պայմանները հրադադարի հարցում չեն փոխվել. ՀԱՄԱՍ-ի ռազմական եւ կառավարչական պոտենցիալի ոչնչացում, բոլոր պատանդների ազատում եւ այն բանի ապահովում, որպեսզի Գազան այլեւս սպառնալիք չներկայացնի Իսրայելի համար»,- հայտնել է Նեթանյահուն։
«Իսրայելը կշարունակի պնդել, որ այս պայմանները կատարվեն մշտական հրադադարի հաստատումից առաջ։ Պատկերացումն այն մասին, որ Իսրայելը կհամաձայնի մշտական հրադադարին այս պայմանների կատարումից առաջ, որեւէ հիմք չունի»,- ավելացրել է նա։ Ավելի վաղ ԱՄՆ նախագահ Ջո Բայդենը հայտնել էր, որ Իսրայելը առաջարկել է Գազայում հրադադարի եռափուլ գործարք՝ ՀԱՄԱՍ-ի կողմից պատանդների ազատ արձակման դիմաց։
