Երկու տարի ա, էս դպրոցը սարքում են, եթե էդ տեմպով են սարքելու, նոր դպրոցը ե՞րբ պատրաստ կլինի. Կիրանցի բնակիչ
Մեր գյուղում պիտի ապրենք, չենք ուզում գյուղը լքել, բա մեր երեխեքին էդ սահմանի վրա ո՞նց դասի տանենք: Կիրանցի բնակիչներից մեկը NEWS.am-ի հետ զրույցում պատմել է, որ գյուղացիներին շարունակում է մտահգոլ հարցը, թե ինչպե՞ս են երեխաները սեպտեմբերից դպրոց գնալու. նորակառույց դպրոցի շենքը սահմանի մոտ է գտնվում:
Անդրադառնալով Նիկոլ Փաշինյանի հայտարարությանը, թե եթե ծնողները ամեն դեպքում չեն ցանկանա իրենց երեխաներին այդ դպրոց ուղարկել, ապա իշխանությունը պատրաստ է գյուղի այլ հատվածում նոր դպրոց կաուցել, Կիրանցի բնակիչն ասել է.
«Մեզ էլ են առաջարկել՝ գյուղի այլ հատվածում դպրոց կառուցել, գոնե էդպես անեն, որ կարողանանք երեխեքին դպրոց տանել: Ուղղակի երկու տարի ա, էս դպրոցը սարքում են, եթե էդ տեմպով են սարքելու, նոր դպրոցը ե՞րբ պատրաստ կլինի»:
Բնակչի խոսքով, Կիրանցում Սահմանազատման և սահմանագծման հետևանքով Ադրբեջանի վերահսկողության տակ անցնող տների բնակիչներն արդեն ստիպված իրենց իրերն են հավաքում, փորձում են հանել այն ինչ հնարավոր է որ դուրս գան տներից:
«Երևի արդեն այլ տարբերակ չկա, ի՞նչ կարող են անել»,-ասել է նա՝ հավելելով, որ տեղյակ չէ, արյդո՞ք նրանք համաձայնել են փոխհատուցման առաջարկին թե ոչ:
Նշենք, որ Նիկոլ Փաշինյանն այսօր՝ մայիսի 29-ին ԱԺ-ի բակում լրագրողների հետ զրույցում՝ հարցին՝ ի՞նչ են անելու, եթե որոշ ծնողներ Կիրանցում հրաժարվեն դպրոց տանել իրեն երեխաներին, քանի որ դպրոցը կարող է մոտ լինել սահմանին, ի պատասխան, ասել է. «Նրանց ցանկությամբ կհասնենք որոշման, լրացուցիչ անվտանգային ծրագրեր կիրականացնենք։ Եթե դա էլ մեր ծնողներին չբավարարի, մենք գյուղի այլ հատվածում նոր դպրոց կկառուցենք, իսկ հին շենքը կամրացնենք սահմանապահ ծառայությանը, քանի որ ծառայությունն էլ ունի շենքային պայմանների կարիք»։
