Հեղեղի հետևանքով մահացածը իր 39-ամյակի օրն է մահացել․ նա 2 անչափահաս երեխա ուներ

Շնող գյուղի մոտ ջրհեղեցից մահացած Սարիբեկ Բալյանը Նոյեմբերյան համայնքի Դեղձավան գյուղից էր, նա երկու անչափահաս երեխաների հայր էր։ Այս մասին NEWS.am-ին պատմել է Դեղձավանի գյուղապետ Յուրիկ Հովհաննեսյանը։

Նա ասաց, որ Սարիբեկ Բալյանը մահացել է աշխատանքից տուն վերադառնալիս․ «Իր 39-ամյակի օրն է մահացել։ Մեքենայում 3 հոգով են եղել, երկուսը կարողացել են դուրս գալ, ինքը՝ ոչ»։

Հիշեցնենք, որ մայիսի 26-ին Լոռիի և Տավուշի մարզերում նախորդ գիշեր տեղացած հորդառատ անձրևների հետևանքով Դեբեդ գետը վարարել էր։ Արդյունքում փլուզվել են ճանապարհներ, կամուրջները, տներն ու ավտոմեքենաները հայտնվել են ջրի տակ, արգելափակվել են մարդիկ, փլուզվել են կամուրջներ։ Վարարման հետևանքով Մ-6 միջպետական ճանապարհը երկկողմանի փակ է երթևեկության համար։ Դեբեդի հունը երեկ 6 մետրով բարձրացել էր, «Ալավերդի-Արճիս-Նոյեմբերյան» 530մմ-ոց ջրատարը հայտնվել է ջրի տակ, ինչի հետեւանքով դադարեցվել էր 16 համայնքների ջրամատակակարումը, այսօր արդեն վերականգնվել է: Հեղեղի հետևանքով այս պահի դրությամբ կա 4 զոհ։ ՇՄՆ-ից հաղորդում են, որ այսօր ժամը 08։00-ի դրությամբ երեկ 08։00-ին դիտված ջրի մակարդակների համեմատ դիտվել է ջրի մակարդակների նվազում. Դեբեդ գետի Այրում դիտակետում 105 սմ-ով , Ձորագետ գետում` 70 սմ-ով, Փամբակ գետում 50 սմ-ով, Տաշիր գետում 57 սմ-ով։ ՏԿԵ նախարար Գնել Սանոսյանը  ասել է, որ վնասի չափը դեռևս չի գնահատվել, սակայն այն սարսափելի մեծ է։