Դեռ ջուրը չի իջել․ Ախթալայի համայնքապետը մանրամասնում է

Ախթալայի այն հատվածները, որտեղ տներն անցել են ջրի տակ, բնակիչները տարհանված են։ Այս մասին NEWS.am-ին պատմել է համայնքապետ Սևակ Սարգսյանը։

«Դեռ ջուրը չի իջել։ Այժմ այն բնակիչները, որոնց տները հայտնվել են ջրի մեջ, տարհանված են։ Մի հատ երկհարկանի բնակելի շենք է, երկու ընտանիք էր ապրում, դա անցել է ջրի տակ։ Տունը ջրի տակ է, նրանց տարհանել ենք։ Երկու հատ էլ առանձնատներ են։ Զոհեր ու վիրավորներ չունենք»,- նշել է համայնքապետը։ Նա ասել է, որ մոտ 15 բնակիչ է տարհանվել։

«Մարդիկ զգացել են, որ ջուրը բարձրանում է, դուրս են եկել։ Միայն 2-3-ին լոտկաներով ենք տարհանել։ Երկու մեքենա է մնացել ջրի տակ ու տները։ Առայժմ այսքանն ունենք։ Երկաթգիծը, կամուրջները կամ փլվել են կամ վնասված են»,- լրատվամիջոցին ասել է Սարգսյանը։

Հարցին՝ արդյո՞ք Ախթալայում էլեկտրաէներգիա կա, Սարգսյանն ասել է. «Տեղ կա կա, տեղ կա, չկա, երեկվա կայծակից անջատվել է լույսը, չենք կարողանում հասնել, սարքել, որովհետև Ախթալայի կամրջի վրայով պիտի անցնենք, կամուրջի վրայով էլ գետը գնում է, վրայով հնարավոր չէ անցնել»։