Առավոտից կմեկնարկեն անհնազանդության և բողոքի ակցիաները

Առավոտյան ժամը 08։00-ից կմեկնարկեն անհնազանդության և բողոքի ակցիաներ։ Ստիպելու ենք իշխանությանը հաշվի նստել ժողովրդի պահանջի հետ։ Այս մասին հայտարարեց Բագրատ Սրբազանը։ 

Տավուշի թեմի առաջնորդ Բագրատ Սրբազանը նաև նշեց․ «Եթե կառավարության ամառանոցների մոտ որեւէ պատճառով հնարավորություն չունենանք խոսելու, նախատեսել ենք ողջ ժամանակի համար, որքան պահանջված է, մեր գործողություններն իրականացնել»։

«Նաեւ ուզում եմ ասել, որ եթե մեր պահանջները չեն իրականանում, վաղը առավոտյան ժամը 8-ին անհնազանդության, բողոքի գործողություններով յուրաքանչյուրիս պատասխանատվությամբ, պետք է ստիպենք հաշվի նստել ժողովրդի պահանջի հետ: Հայաստանի ամբողջ տարածքով մեկ անհնազանդության, բողոքի, ընդվզման, խաղաղ գործողություններով ստիպել ընդունելու ժողովրդի պահանջն ու իշխանությունը: Առավոտյան ժամը 8-ին ինձնից սկսած լինելու ենք հրապարակներում, եւ մեր այսպիսի բազմության առկայությամբ աշխատանքից ազատելու ենք բոլոր այն մարդկանց, որոնք սահմանափակել են, կեղեքել են մեր կյանքը»,-ասաց Սրբազանը:

Հանրապետության հրապարակում «Տավուշը հանուն հայրենիքի» հրավիրած հանրահավաքի ժամանակ Բագրատ սրբազանը հայտարարեց` գնալու է կառավարական ամառանոց` հանդիպելու ՀՀ վարչապետ Նիկոլ Փաշինյանին։

Նշենք, որ քիչ առաջ հայտարարվեց, որ վարչապետի թեկնածուն Բագրատ Սրբազանն է։ Հաղորդվեց նաև, որ Բագրատ Սրբազանը սառեցնում է հոգևոր ծառայությունը։