Իսրայելը վերանայում է Պաղեստինը ճանաչած երկրների նկատմամբ հետագա դիվանագիտական քայլերը․ CNN

Իսրայելի արտաքին գործերի նախարարությունը վերանայում է Նորվեգիայի, Իռլանդիայի և Իսպանիայի նկատմամբ հետագա դիվանագիտական քայլերը այն բանից հետո, երբ այդ երկրները որոշել են ճանաչել Պաղեստինի անկախությունը: Այս մասին գրում է CNN-ը՝ հղում անելով իր աղբյուրին։

Հեռուստաալիքի զրուցակցի տվյալներով՝ հնարավոր քայլերից մեկը պաշտոնատար անձանց այցերի չեղարկումն է Իսրայել և երեք երկրների դիվանագետների այցագրերի հետկանչումը: Նման միջոցը կսահմանափակի Հորդանան գետի Արևմտյան ափի շրջաններ այցելելու հնարավորությունը, որոնք գտնվում են պաղեստինյան ինքնավարության վերահսկողության տակ։ 

Բացի այդ, Իսրայելը կարող է դիմել ԱՄՆ-ին դիվանագիտական աջակցության համար՝ իրենց որոշման պատճառով Նորվեգիայից, Իռլանդիայից և Իսպանիայից բացատրություններ ստանալու նպատակով: Ինչպես նաև հրեական պետությունը կարող է խնդրել Վաշինգտոնին համոզել այլ երկրներին չհետևել Պաղեստինի ճանաչման օրինակին։ 

Հիշեցնենք՝ երեկ՝ մայիսի 22-ին Նորվեգիայի կառավարությունը պաշտոնապես հայտարարեց, որ ճանաչում է Պաղեստին պետության անկախությունը: Որոշումն ուժի մեջ կմտնի մայիսի 28-ից: Նորվեգիայից հետո Պաղեստինի անկախությունը ճանաչել են Իռլանդիան և Իսպանիան։

Այս ֆոնին Իսրայելը հետ է կանչել Նորվեգիայում և Իռլանդիայում իր դեսպաններին հետագա խորհրդակցությունների համար և նման միջոցներով սպառնացել Իսպանիային: