Հայաստանի պետական հետաքրքրությունների ֆոնդը (ANIF) կլուծարվի, որոշումն ընդունվեց կառավարության այսօրվա նիստում։

Մինչ այդ, ընկերության կառավարումը կհանձնվի Պետական գույքի կառավարման կոմիտեին։

Ֆոնդը լուծարելու մասին որոշումը կայացվել է դեռ 2024 թվականի մարտի 14-ին՝ վարչապետի գլխավորությամբ։ Նախագծի հիմնավորման մեջ, սակայն, նշված չէ, թե ինչու են որոշել լուծարել Հայաստանի պետական հետաքրքրությունների ֆոնդը։

Ընկերությունը ստեղծվել է Հայաստանի Հանրապետության կառավարության 2019 թվականի ապրիլի 18-ի որոշմամբ։ Ընկերության՝ ՀՀ սեփականություն հանդիսացող բոլոր 100 տոկոս բաժնետոմսերի կառավարման լիազորությունը վերապահված էր ՀՀ էկոնոմիկայի նախարարությանը, հիմա, սակայն, բաժնետոմսերի կառավարումը կհանձնվի Տարածքային կառավարման և ենթակառուցվածքների նախարարության պետական գույքի կառավարման կոմիտեին։

Հիշեցնենք՝ ավելի վաղ «Ազատություն»-ը գրել էր՝ Պետական վերահսկողական ծառայությունը (ՊՎԾ) ուսումնասիրություններ է արել ԱՆԻՖ-ում՝ Պետական հետաքրքրությունների ֆոնդ ընկերությունում ու պարզել, որ ընկերությունը պետությունից ստացած ֆինանսական միջոցները արդյունավետ չի օգտագործել։ Նշվում էր, որ Պետական հետաքրքրությունների ֆոնդը 2019-ին Կառավարության կողմից հիմնադրված փակ բաժնետիրական ընկերություն է։ Վերջին տարիներին այն նախ եղել է Կառավարության, ապա Էկոնոմիկայի նախարարության կազմում։ Դրա նպատակը օտարերկրյա ներդրումների ներգրավումն է, արտահանման աճի խթանումը և հայաստանյան նախագծերում ներդրումներ անելը։