«Դժվար է հավատալ». Պեսկով

ՌԴ նախագահի մամուլի քարտուղար Դմիտրի Պեսկովը ԱՄՆ պետքարտուղար Էնթոնի Բլինկենի հայտարարությունն անհարմար ու բռի է անվանել:

Ավելի վաղ Բլինկենը հայտարարել էր, որ Իրանի ժողովուրդն ու ամբողջ աշխարհն ընդհանուր առմամբ շահել են ավիավթարի հետևանքով Ռայիսիի զոհվելուց:

«Գիտեք, ճիշտն ասած` ես այդ հայտարարության բնօրինակը դեռ չեմ տեսել։ Դժվար է հավատալ, որ դիվանագետը, առավել ևս՝ Ամերիկայի Միացյալ Նահանգների նման երկրի այդքան բարձրաստիճան ներկայացուցիչը, կարող էր այդպիսի, դիվանագիտորեն ասած, անհարմար հայտարարություն անել։ Իսկ դա, ըստ էության, բռի հայտրարարություն է մի ամբողջ ժողովրդի հասցեին»,-ասել է Պեսկովը` մեկնաբանելով Բլինկենի հայտարարությանը Կրեմլի վերաբերմունքը։

Ավելի վաղ Բլինկենը Սենատի արտաքին հարաբերությունների հանձնաժողովում լսումների ժամանակ հանդես էր եկել հայտարարությամբ, որ ԱՄՆ-ն, չնայած պաշտոնական ցավակցություններին, չի սգում Իրանի նախագահի մահվան կապակցությամբ: Նրա խոսքով՝ Իրանի ժողովրդի համար նախագահի մահից հետո հավանաբար ավելի լավ է։

Հիշեցնենք` Իրանի նախագահ Էբրահիմ Ռայիսիին և արտգործնախարար Հոսեյն Ամիր Աբդոլլահիանին տեղափոխող ուղղաթիռը կործանվել է մայիսի 19-ին երկրի հյուսիս-արևմուտքում՝ Վերզեգանի շրջանում: Բարձրաստիճան պաշտոնյաները վերադառնում էին Արաքս գետի վրա հիդրոհանգույցների բացման արարողությունից, որին մասնակցում էր Ադրբեջանի նախագահ Իլհամ Ալիևը: Փրկարարների թիմերը մեկնել էին արտակարգ պատահարի վայր և որոնումներ իրականացրել ամբողջ գիշեր, նրանց աշխատանքը բարդացել էր մթության և տեղատարափի պատճառով:

Մայիսի 20-ի առավոտյան հայտնի դարձավ, որ հայտնաբերվել են ուղղաթիռի այրված բեկորները, իսկ ինքնաթիռում գտնվող բոլոր մարդիկ մահացել են։