ՌԴ-ն պատրաստ է աջակցել Ռայիսիի ուղղաթիռի կործանման պատճառները պարզելու հարցում․ Շոյգու

ՌԴ անվտանգության խորհրդի քարտուղար Սերգեյ Շոյգուն Իրանի նախագահ Էբրահիմ Ռայիսիի մահվան կապակցությամբ ցավակցական հեռագիր է հղել և ուղղաթիռի կործանման իրական պատճառները պարզելու հարցում անհրաժեշտ աջակցություն ցուցաբերելու պատրաստակամություն հայտնել։ Տեղեկությունը հայտնում է ՌԴ անվտանգության խորհրդի աշխատակազմի մամուլի ծառայությունը:

«Ընդունեք մեր խորին ցավակցությունները Իրանի նախագահ Ռայիսիի ողբերգական մահվան կապակցությամբ: Սգում ենք այս անդառնալի կորուստը իրանցի ժողովրդի հետ միասին։ Համոզված եմ, որ նրա գործը շարունակվելու է, իսկ նրա հիշատակը վառ է մնալու դարերով։ Վերահաստատում եմ Ռայիսիին տանող ուղղաթիռի կործանման իրական պատճառները պարզելու հարցում անհրաժեշտ աջակցություն ցուցաբերելու պատրաստակամությունը»,- ասված է հեռագրում:

Հիշեցնենք` Իրանի նախագահ Էբրահիմ Ռայիսիին և արտգործնախարար Հոսեյն Ամիր Աբդոլլահիանին տեղափոխող ուղղաթիռը կործանվել է մայիսի 19-ին երկրի հյուսիս-արևմուտքում՝ Վերզեգանի շրջանում: Բարձրաստիճան պաշտոնյաները վերադառնում էին Արաքս գետի վրա հիդրոհանգույցների բացման արարողությունից, որին մասնակցում էր Ադրբեջանի նախագահ Իլհամ Ալիևը: Փրկարարների թիմերը մեկնել էին արտակարգ պատահարի վայր և որոնումներ իրականացրել ամբողջ գիշեր, նրանց աշխատանքը բարդացել էր մթության և տեղատարափի պատճառով:

Մայիսի 20-ի առավոտյան հայտնի դարձավ, որ հայտնաբերվել են ուղղաթիռի այրված բեկորները, իսկ ինքնաթիռում գտնվող բոլոր մարդիկ մահացել են։