Հաղթելու դեպքում միգրանտներին կուղարկեմ «այնտեղ, որտեղ նրանց տեղն է»․ Թրամփ
ԱՄՆ նախկին նախագահ Դոնալդ Թրամփը հայտարարել է, որ նոյեմբերին կայանալիք ընտրություններում հաղթելու դեպքում կփակի երկրի հարավային սահմանը և վերջ կդնի Մեքսիկայից ներգաղթյալների հոսքին: «Իմ նոր վարչակազմի աշխատանքի առաջին իսկ օրը ես կնքելու եմ հարավային սահմանը, վերջ եմ դնելու այդ արշավանքին»,-հայտարարել Է Սպիտակ տան նախկին ղեկավարը:
Թրամփն ընդգծել է, որ ԱՄՆ նախագահի պաշտոնում ընտրվելու դեպքում ամերիկյան տարածքում գտնվող ապօրինի ներգաղթյալներին կուղարկի «այնտեղ, որտեղ իրենց տեղն է»՝ տուն: Ելույթ ունենալով Նյու Ջերսի նահանգում ընթացիկ տարվա խոշորագույն հանրահավաքում, որտեղ հավաքվել է 80-100 հազար մարդ, նախկին նախագահը, ի թիվս այլ բաների, խոստացել է, որ իր կառավարման օրոք ԱՄՆ-ում կսկսվի ամերիկյան պատմության մեջ ամենամասշտաբային արտաքսման գործողությունը, հաղորդում է «ՌԻԱ Նովոստին»:
Ամերիկայի Միացյալ Նահանգների նախագահի հերթական ընտրությունները նշանակված են նոյեմբերի 5-ին: Երկրում արդեն ներկուսակցական մրցավազք է սկսվել։ Պետության ղեկավարի պաշտոնի հավակնորդները պայքարում են ընտրիչների ձայների համար, որպեսզի դառնան պաշտոնական թեկնածուներ։
