Ստոլտենբերգն` Ուկրաինայում ՆԱՏՕ-ի ուժեր տեղակայելու մասին

ՆԱՏՕ-ի գլխավոր քարտուղար Ենս Ստոլտենբերգը հայտարարել է, որ Ուկրաինան դաշինքին չի խնդրել իր զորքերը երկիր ուղարկել։ Նրա խոսքով՝ Կիևը հարձակողական հրետանի է խնդրել։

«ՆԱՏՕ-ն չի պլանավորում ուժեր տեղակայել Ուկրաինայում։ Երբ ես անցյալ շաբաթ հանդիպեցի Ուկրաինայի իշխանությունների հետ, նրանք դա չխնդրեցին»,- իտալացի լրագրողներին ասել է Ստոլտենբերգը, որի խոսքը մեջբերում է ANSA գործակալությունը:

ՆԱՏՕ-ի գլխավոր քարտուղարը նախկինում բազմիցս խոսել է Ուկրաինա զորքեր ուղարկելու ծրագրերի բացակայության մասին։ Ապրիլին նա նշել է, որ դաշինքի երկրները Ուկրաինային տրամադրում են «զգալի ռազմական աջակցություն» և կոչ է արել ավելացնել մատակարարումները, հատկապես հակաօդային պաշտպանության համակարգերը:

Վերջին ամիսներին Ֆրանսիայի նախագահ Էմանուել Մակրոնը բազմիցս խոսել է զորքեր ուղարկելու հնարավորության մասին։ Նրա խոսքերից հետո ՆԱՏՕ-ի որոշ երկրներ հայտարարել են նման ծրագրերի բացակայության մասին, որոշները աջակցել են այս հարցի քննարկմանը։ Այս շաբաթ ԱՄՆ Ներկայացուցիչների պալատի դեմոկրատական փոքրամասնության առաջնորդ Հակիմ Ջեֆրիսը չի բացառել ամերիկյան զորքերի ուղարկումն Ուկրաինա։