Ոչ ռազմավարական միջուկային ուժերի զորավարժությունները, որոնց մասին այսօր հայտարարել է ՌԴ ՊՆ-ն, կապված են ուկրաինական հակամարտության «լարման աննախադեպ փուլի» հետ։ Այս մասին ասել է ՌԴ նախագահի մամուլի քարտուղար Դմիտրի Պեսկովը։ 

Նա նշել է, որ Արևմուտքն Ուկրաինայում լարվածության նոր, աննախադեպ փուլ է հրահրում, դա պահանջում է պատասխան միջոցներ Մոսկվայի կողմից։

Պեսկովի խոսքով՝ զորավարժությունները հրահրել են Ֆրանսիայի նախագահ Էմանուել Մակրոնի և Մեծ Բրիտանիայի արտաքին գործերի նախարար Դևիդ Քեմերոնի վերջին հայտարարությունները։

«ՊՆ-ն ամեն ինչ սպառիչ ասել է: Եթե հարցնում եք, թե ինչ հայտարարությունների մասին է խոսքը, ապա դրանք Մեծ Բրիտանիայի ԱԳՆ ղեկավարի, Մակրոնի ու ամերիկացիների խոսքերն են ՆԱՏՕ-ի զինվորներին մարտադաշտ դուրս բերելու մտադրությունների վերաբերյալ: Սա լարվածության աննախադեպ փուլ է, որը պահանջում է հատուկ ուշադրություն և հատուկ միջոցներ»,- մամուլի ասուլիսի ժամանակ պարզաբանել է Դմիտրի Պեսկովը։