Վրաստան մտնելուց հունիսի 1-ից առողջության պարտադիր ապահովագրության մասին մանրամասներ

2024 թվականի հունիսի 1-ից Վրաստանում արտասահմանցիների համար պարտադիր կդառնա կյանքի և առողջության ապահովագրությունը, որն ապահովելու է զբոսաշրջիկի համար անհրաժեշտ բուժօգնության տրամադրումը և դժբախտ պատահարներից ապահովագրումը: Այսինքն, ցանկացած օտարերկրացի, որը ցանկանում է մեկնել Վրաստան՝ անկախ այցի նպատակից, անպայման պետք է ունենա նշյալ ապահովագրությունը:

Հակառակ դեպքում յուրաքանչյուր չապահովագրված անձի համար կիրառվելու է տուգանք 300 լարիի չափով (մոտ 46 հազար դրամ): Այս օրենքը Վրաստանի խորհրդարանի կողմից ընդունվել է անցյալ տարեվերջին: Կիրառմանը փաստացի մնացել է մեկուկես ամիս, սակայն ուշագրավ է, որ մեր պատկան կառույցները դեռևս չեն շտապում պատշաճ ծանուցել մեր հանրությանը: Այնինչ, համապատասխան իրազեկումները շատ կարևոր են՝ հաշվի առնելով, թե հատկապես ամռանը ՀՀ որքան քաղաքացի է մեկնում Վրաստան: Ըստ վիճակագրության, միայն 2023 թվականին այդ թիվը եղել է մոտ 900 հազար:

Առավոտից Auroranews-ը փորձում է կապ հաստատել այս հարցում շահագրգիրռ մարմինների և պատկան կառույցների հետ: Սկսեցինք ՀՀ ԱԳ նախարարությունից: Քանի որ զանգերն անպատասխան էին, կապ հաստատեցինք Վրաստանում Հայաստանի դեսպանատան հետ, որտեղից մեզ ուղղորդեցին հյուպատոսկան բաժին և միակ բանը, որ ասացին, այն է, որ որոշումից տեղյակ են և այս պահին սպասում են պաշտոնական տվյալների: ՀՀ ԱԳՆ-ի վրացական բաժին կատարած մեր զանգերը ևս մնացին անպատասխան: ԱԳՆ մամուլի խոսնակը Auroranews-ին ասաց, որ երբ հստակ լինի, կտեղեկացնեն:

Auroranews-ը դիմեց Վրաստանում իր գոծընկերներին, որոնք մեզ փոխանցեցին TBC insurance կայքը, որտեղ հնարավոր է օնլայն առողջապահական ապահովագրություն կատարել, սակայն այն երկլեզու է, վրացերեն և անգլերեն: Անհրաժեշտ է ժամանակ հատկացնել, որպեսզի հասկանալի լինի ինչպես կատարել ապահովագրությունը:

Ինչևէ, խուճապի չենք մատնվում, հունիսի 1-ից Վրաստանում արտասահմանցիների համար կյանքի և առողջության ապահովագրության պարտադիր որոշումը ուժի մեջ մտնելու օրենքից, մենք այս հարցում մեր ձեռքը կպահենք զարկերակի վրա, և նոր տեղեկություն լինելու դեպքում կհայտնեք: