Թաիլանդից Թել Ավիվ չվերթի ժամանակ երկու ինքնաթիռ շեղվել է, իսկ Իսրայելի գլխավոր օդանավակայանը՝ փակվել

Իսրայելական El Al ավիաընկերության երկու ինքնաթիռ Թաիլանդից Թել Ավիվ չվերթի ժամանակ շեղվել է Իրանի սպասվող հարձակման ֆոնին, հայտնում է իսրայելական Times of Israel թերթը։

«Թաիլանդից Թել Ավիվ Էլ Ալ-ի մի զույգ չվերթ շեղվել է Իրանի սպասվող հարվածի պատճառով»,- ասվում է հրատարակության մեջ:

ՏԱՍՍ-ը հաղորդում է, որ Իսրայելի գլխավոր «Դավիթ Բեն Գուրիոն» օդանավակայանը կիրակի գիշերը երեք ժամով փակ կլինի Իրանի կողմից հարձակման սպառնալիքի պատճառով։ Այսպիսի հայտարարություն է արել իսրայելական հեռուստատեսության 12-րդ ալիքը։

Միևնույն ժամանակ, հեռուստաալիքը մեջբերում է տրանսպորտի նախարարության ներկայացուցչի հայտարարությունը, որը նշել է, որ մինչ այժմ «ոչ մի փոփոխություն» չի կատարվել «Բեն-Գուրիոնի» թռիչքի և վայրէջքի ժամանակացույցում։