Հայաստանն ու Վրաստանը պայմանավորվածություն են ձեռք բերել․ Կոստանյան

Հայաստանի և Վրաստանի միջև սահմանազատման աշխատանքները վերսկսելու պայմանավորվածություն է ձեռք բերվել։ Այս մասին լրագրողների հետ զրույցում ասել է ՀՀ արտգործնախարարի տեղակալ Վահան Կոստանյանը։

«Երկու երկրների կառավարությունները պայմանավորվածություն են ձեռք բերել, որ սահմանազատման աշխատանքները պետք է վերսկսվեն, որոնք բավականին երկար ժամանակ դադար էին ստացել։ Երկու երկրներն էլ թարմացրել են սահմանազատման իրենց հանձնաժողովները։ Նիստ դեռևս տեղի չի ունեցել։ Երկու կողմն էլ որոշակի տնային աշխատանքներ են կատարում»,- նշել է Կոստանյանը։

Նա հույս է հայտնել, որ առաջին նիստը չի ուշանա։

Պատասխանելով դիտարկմանը, թե տեղեկություններ են շրջանառվում, որ Լոռու մարզից տարածք է զիջվելու Վրաստանին, փոխնախարարը պատասխանեցլ է, որ սահմանազատման գործընթաց է լինելու։ Նրա նշել է, որ տրամաբանությունը սա է` վերականգնել բոլոր հարևան երկրների հետ 1991 թվականի Ալմա Աթայի հռչակագրի ստորագրման ժամանակ առկա սահմանագիծը։

«Հայաստան-Վրաստան ռազմավարական գործընկերություն» խորագրով համաժողովի ժամանակ էլ Վահան Կոստանյանը հայտարարել էր, որ հայ-վրացական հարաբերություններում բավականին խորքային փոփոխություններ են տեղի ունեցել, միևնույն ժամանակ ռազմավարական գործընկերության համատեքստում դեռ շատ անելիք կա։