Հայաստանի և Վրաստանի միջև սահմանազատման աշխատանքները վերսկսելու գործընթացը կարևոր է, քանի որ բոլոր պետությունները պետք է միջպետական պայմանագրով ֆիքսված սահման ունենան: Այս մասին «Հայաստան-Վրաստան ռազմավարական գործընկերություն» խորագրով համաժողովին լրագրողների հետ զրույցում ասել է վրացագետ Ջոնի Մելիքյանը։

«Ունենալով ռազմավարական հարաբերություններ Վրաստանի հետ, Ադրբեջանն այդ գործընթացը չավարտեց և այսօր նույն մակարդակի հարաբերություններ ունենալով, մենք այս գործընթացը վերսկսելով, նաև ինչ-որ չափով օրինակ ցույց կտանք մեր հակառակորդին»,-ասել է նա և հավելել, որ գործընթացը կարող է նախատիպային լինել հայ-ադրբեջանական գործընթացի համար։

«Եթե նույն տրամաբանությամբ հայ-վրացականը սկսվի, ապա Բաքուն ստիպված կլինի սա ևս նկատի ունենալ»,- նշել է վրացագետը։ 

Ըստ վերջինիս՝ գործընթացը Վրաստանի հետ էլ է կարևոր․ ևս մեկ երկրի հետ ունենալ միջպետական պայմանագրով ֆիքսված սահման։

Պատասխանելով այն դիտարկմանը, որ հնարավոր է՝ այս գործընթացը տարածքային վեճերի առիթ դառնա՝ Ջոնի Մելիքյանը պատասխանել է, որ հիմնական մասը հստակեցված է եղել տասնյակ տարիների ընթացքում։

Նա նշել է․ «Եթե չեմ սխալվում, 40 տոկոսն է մնացել, խնդրահարույց հատվածներ կան և հստակ է, որ փոխզիջման տարբերակով բարիդրացիական հարաբերություններ ունեցող երկրները պետք է այդ հարցը լուծեն»։