Կալինինգրադի մարզում Կոլումբիայից բերված բանաններում հայտնաբերվել է 76 կգ կոկաին

Կալինինգրադի մարզում բանջարեղենի պահեստում Կոլումբիայից բերված բանանի խմբաքանակում 76 կիլոգրամ արգելված նյութ է հայտնաբերվել։

Ըստ «МВД Медиа»-ի՝ բեռի զննության ընթացքում իրավապահները առգրավել են ինը արկղ, որոնց մեջ բանանի վերին շերտին դարսված էր 76 կիլոգրամ փոշենման սպիտակ նյութի մամլած փաթեթներ։

ՌԴ ՆԳՆ պաշտոնական ներկայացուցիչ Իրինա Վոլկը ասել է, որ նախնական տվյալներով դրանցում կոկաին է եղել։

Ոստիկանության տվյալներով՝ բանանի խմբաքանակը Կոլումբիայից ծովով հասցվել է Գերմանիա, այնուհետև մեքենայով՝ Լիտվա, այնտեղից էլ՝ Ռուսաստան։

Բեռնատարը վարել է Բելառուսի 44-ամյա մի բնակիչ։ Բեռնաթափումից հետո մեքենան ուղղություն է վերցրել դեպի Լեհաստան։