ՏԵՍԱՆՅՈՒԹ․ «Պուտին, օգնի՛ր»․ Օրսկում մարդիկ հավաքվել են քաղաքի գլխավոր հրապարակում

ՌԴ Օրսկում մարդիկ հավաքվել են քաղաքի գլխավոր հրապարակում։ Նրանք բողոքում են տեղի իշխանություններից և ջրհեղեղից հետո վճարումների չափից: Այս մասին տեղեկանում ենք BAZA թելեգրամյան ալիքից։ 

Ավելի քան հարյուր տեղացիներ դուրս են եկել Օրսկի Կոմսոմոլսկայա հրապարակում գտնվող Լենինի հուշարձանի մոտ։ Մարդիկ վանկարկում են «Պուտին, օգնիր»  և բողոքում ջրհեղեղից հետո տեղի իշխանությունների գործողություններից:

Ոստիկանները տեղի բնակիչներից պահանջում են հեռանալ հրապարակից ՝ հայտարարելով, որ հանրահավաքն անօրինական է։ Ավելի վաղ տեղի դատախազությունը հայտնել էր ակցիային մասնակցելու համար պատասխանատվության մասին:

Օրսկի բնակիչները պահանջում են նաև բարձրացնել փոխհատուցման գումարը։ Այժմ գույքի ամբողջական կորստի համար դրա չափը կազմում է 100 հազար ռուբլի ( մոտ 1000 դոլար), մասնակի կորստի համար ՝ 50 հազար (մոտ 500 դոլար)։ Սակայն, ըստ տեղացիների, այդ գումարը չի կարող հոգալ ջրհեղեղի հետ կապված ծախսերը:

Ապրիլի 4-ից Օրենբուրգի մարզում գործում է արտակարգ իրավիճակների տարածաշրջանային ռեժիմ՝ հեղեղումների իրադրության վատթարացման պատճառով։ Ամենալուրջ իրավիճակն Օրսկում է, հեղեղումները մեծապես ազդում են նաև Օրենբուրգի վրա։

Ապրիլի 8-ի առավոտվա դրությամբ Օրենբուրգի մարզում ջրի տակ են մնացել 10168 բնակելի շենք և 18471 կենցաղային հողատարածք։ Տարհանվել է 6127 մարդ, այդ թվում՝ 1478 երեխա։ Ավելի քան 1,2 հազար տարհանված գտնվում է ժամանակավոր տեղավորման կենտրոններում։