Թուրքիայում մանրամասներ են հայտնել սիրիական Աազազ քաղաքի ահաբեկչությունից
Սիրիայի հյուսիսում գտնվող Աազազ քաղաքում՝ Թուրքիայի հետ սահմանի մոտակայքում, տեղի ունեցած ահաբեկչության հետևանքով 4 մարդ Է զոհվել, 20-ը՝ վիրավորվել: Այս մասին հայտնում է թուրքական պետական Anadolu գործակալությունը: Տեղեկությունը փոխանցում ՌԻԱ Նովոստին:
«Ավտոմեքենայի վրա տեղադրված ռումբը պայթել է Աազազ քաղաքի բանուկ փողոցում՝ Քիլիսի դիմաց։ Նախնական տվյալներով՝ ահաբեկչության հետևանքով զոհվել է 4 խաղաղ բնակիչ, 20 մարդ վիրավորվել է», — հայտնել է պարբերականը։
Ահաբեկչությունից հետո շրջանում ուժեղացվել են անվտանգության միջոցառումները, իսկ վիրավորները հոսպիտալացվել են: Տեղի անվտանգության ուժերը ուսումնասիրել են դեպքի վայրը և սկսել ահաբեկչության հետաքննությունը:
«Առայժմ ոչ ոք չի ստանձնել ահաբեկչության պատասխանատվությունը», - պարզաբանում Է գործակալությունը:
Հիշեցնենք, որ նախօրեին առնվազն յոթ մարդ Է զոհվել Սիրիայի հյուսիսում գտնվող Աազազ քաղաքում ավտոմեքենայի պայթյունի հետեւանքով, 30 քաղաքացի տուժել է, նրանց թվում կան ծանր վնասվածքներ ստացածներ։ Նրանց տեղափոխել են հիվանդանոց։
