Sputnik-Տաջիկստանի աղբյուրը հայտնել է, որ մերձմոսկովյան «Կրոկուսում» տեղի ունեցած ահաբեկչության ենթադրյալ հեղինակներից մեկը՝ Շամսիդին Ֆարիդունին, կապված է Թուրքիայի տաջիկական ծայրահեղական կազմակերպությունների հետ։ Աղբյուրի փոխանցմամբ՝ տղամարդը Ստամբուլում ահաբեկչություն իրականացնելու համար պատրաստություն է ստացել։

2024 թվականի սկզբին, ինչպես գրում է Sputnik-Տաջիկստանը, տղամարդը գնացել է Ստամբուլ, որից հետո «ծայրահեղականության նշաններ է սկսել ցույց տալ ընտանիքի և ընկերների հետ զրույցներում»։ Այս ճանապարհորդության ընթացքում, ըստ հրատարակության աղբյուրի, նա սովորել է «մենթորների» հետ, ովքեր կռվել են Աֆղանստանում և Սիրիայում Իսլամական պետության շարքերում:

Sputnik-Տաջիկստանի աղբյուրը նշել է, որ ԻՊ-ի հետ կապեր ունեցող կասկածյալներ Թուրքիայում ձերբակալվել են Շամսիդին Ֆարիդունու կողմից հարցաքննության ժամանակ տրամադրված տեղեկատվության շնորհիվ։ Թուրքիայի ներքին գործերի նախարարությունն այսօր՝ մարտի 31-ին, հայտնել է, որ 4 օրվա ընթացքում 21 նահանգներում 51 կասկածյալ է ձերբակալվել։

Շամսիդին Ֆարիդունին վեց տարվա պատիժ է կրել 16 տարեկանում վեցերորդ դասարանցու բռնաբարության համար, հայտնում է աղբյուրը։ Տղամարդն ազատ է արձակվել 2020 թվականին, մեկնել է Մոսկվա, աշխատել որպես բանվոր և շինարար, երկու տարի առաջ վերադարձել է Տաջիկստան։

Նա բերման է ենթարկվել հարձակման հաջորդ օրը՝ մարտի 23-ին, երեք ենթադրյալ հեղինակների հետ միասին։ Հարցաքննության ժամանակ նա հայտնել է, որ հանձնարարություն է ստացել «քարոզչի օգնականից» և կրակել է մարդկանց «Կրոկուսում» 500 հազար ռուբլով։ Շամսիդին Ֆարիդունին մարտի 7-ին նկատել են համերգասրահում։ Աշխատակիցներից մեկի խոսքով՝ ինքը շրջել է սրահով, նայելով շուրջը և հարցրել, թե ինչ կա շենքում։

144 մարդու կյանք խլած ահաբեկչության հետաքննության շրջանակներում ձերբակալվել է 9 մարդ։ Մարտի 23-ի գիշերը լրատվամիջոցները գրել էին, որ ահաբեկչական խմբավորումը  ստանձնել է հարձակման պատասխանատվությունը։ Մինչդեռ Ռուսաստանի Քննչական կոմիտեն, վկայակոչելով ձերբակալվածների ցուցմունքները, հայտնել է, որ ահաբեկչության հեղինակները հարձակումից հետո Կիևում պետք է պարգև ստանային։