ՆԱՏՕ-ի գործունեությունը Արևելյան Եվրոպայում և Սևծովյան տարածաշրջանում ուղղված է դաշնակիցներին Ռուսաստանի հետ հնարավոր բախման նախապատրաստելուն։ Այս մասին ՌԻԱ Նովոստիին հայտնել են ՌԴ ԱԳՆ-ից:

Ռումինիայի իշխանություններն ավելի վաղ խոստացել էին 2,5 մլրդ եվրո ներդնել Կոնստանցա գավառում «Միխայիլ Կոգելնիչանու» ավիաբազայի արդիականացման համար: Այնտեղ կհայտնվի նաև ռազմական ավան, որտեղ կարող են տեղավորվել 10 հազար զինվորականներ՝ ընտանիքներով։ TVP Info հեռուստաալիքը նշել է, որ արդիականացումը թույլ կտա մինչեւ 2040 թվականը ռազմակայանը վերածել Եվրոպայում ՆԱՏՕ-ի նման խոշորագույն օբյեկտի: Ամերիկյան զորքերը այն օգտագործում են 1999 թվականից։

«Ռումինական ավիաբազայի ընդլայնումը եւս մեկ ապացույց է այն բանի, որ Հյուսիսատլանտյան դաշինքը շարունակում է Արեւելյան Եվրոպայի եւ Սեւծովյան տարածաշրջանի սանձարձակ ռազմականացումը», – նշել են ԱԳՆ-ում:

Գերատեսչությունում հավելել են, որ «կոալիցիոն պոտենցիալների ուժեղացում տեղի է ունենում նաեւ Լեհաստանում, Մերձբալթյան երկրներում»:

Նման ակտիվությունը, դիվանագետների խոսքով, սադրիչ է, այն սրում է ռազմական լարվածությունը Ռուսաստանի սահմանների երկայնքով, լրացուցիչ սպառնալիքներ է ստեղծում երկրի անվտանգության համար:

«Այս ամենը միտված է դաշինքի դաշնակիցներին մեր երկրի հետ հնարավոր բախման նախապատրաստելուն»,- ընդգծել են նախարարությունից։

ԱԳՆ-ում խոստացել են հետևել Ռումինիայի գործողություններին, գնահատել առաջացող ռիսկերը և հաշվի առնել դրանք ռազմական պլանավորման ընթացքում: Ռուսաստանի նախագահ Վլադիմիր Պուտինը չորեքշաբթի երեկոյան Տորժկայում ռազմական օդաչուների հետ հանդիպման ժամանակ նշել է, որ Ռուսաստանը չէ, որ շարժվել է դեպի ՆԱՏՕ — ի երկրների սահմանները. ամեն ինչ հակառակն է տեղի ունեցել:

«Նրանք մոտենում են մեզ և մոտենում։ Իսկ մենք ինչ ենք անում։ Միայն պաշտպանում ենք մեր ժողովրդին մեր պատմական տարածքներում», — ասել է պետության ղեկավարը։

Մոսկվան բազմիցս նշել է, որ Հյուսիսատլանտյան դաշինքն ուղղված է առճակատման, իսկ դրա հետագա ընդլայնումը ավելի մեծ անվտանգություն չի բերի Եվրոպային։ Ընդ որում, Կրեմլում ընդգծել են, որ Ռուսաստանը սպառնալիք չի ներկայացնում դաշինքի երկրներից ոչ մեկի համար, բայց անուշադրության չի մատնի իր շահերի համար պոտենցիալ վտանգավոր գործողությունները: Այնուամենայնիվ, այն բաց է մնում երկխոսության համար, բայց իրավահավասար հիմունքներով, իսկ Արևմուտքը պետք է հրաժարվի մայրցամաքի ռազմականացման ուղեգծից։