ԱՄՆ Բալթիմորում կամրջի փլուզումից հետո փրկարարները ջրից դուրս են բերել երկու տուժածի, մեկի վիճակը ծանր է։ Այս մասին հաղորդում է CNN հեռուստաալիքը ՝ վկայակոչելով տեղի հրշեջ ծառայության ղեկավար Ջեյմս Ուոլեսին:

«Ջրից փրկել են երկու մարդու, նրանցից մեկը վնասվածք է ստացել, երկրորդը հոսպիտալացվել է և գտնվում է ծանր վիճակում», - Ուոլեսի խոսքը մեջբերում է հեռուստաալիքը:

Ինչպես նշել է Ուոլեսը, փրկարարները շարունակում են փնտրել առնվազն յոթ մարդու, սակայն նրանց ճշգրիտ թիվը հայտնի չէ, քանի որ դա «շատ մասշտաբային միջադեպ է»:

2,57 կմ ձգվող «Ֆրենսիս Սկոթ Քի» կամուրջը փլուզվել է գիշերը։ 

Հիշեցնենք՝ ավելի վաղ հայտնել էինք, որ ԱՄՆ Մերիլենդ նահանգի Բալթիմոր քաղաքում փլուզվել է Ֆրենսիս Սքոթ Քիի կամուրջը։ Փլուզումը տեղի է ունեցել, երբ նավը բախվել է կամրջին։ Այս մասին հայտնում են տեղի լրատվամիջոցները։ Երկու ուղղություններով երթևեկությունը փակ է:

Տեսախցիկը ֆիքսել է՝ ինչպես է նավը բախվում կամրջին և փլուզում այն։