Կաշառք ստանալու համար ձերբակալված քաղաքապետարանի կին պաշտոնյան կալանավորվել է

Երևանի քաղաքապետարանի՝ կոռուպցիոն գործով երեկ ձերբակալված պաշտոնատար անձը կալանավորվել է՝ երկու ամսով։ Հակակոռուպցիոն դատարանը բավարարել է Երևանի քաղաքապետարանի աշխատակազմի ճարտարապետության և քաղաքաշինության վարչության քաղաքաշինական փաստաթղթերի ձևակերպման 2-րդ բաժնի գլխավոր մասնագետ Քնարիկ Պետրոսյանի նկատմամբ որպես խափանման միջոց կալանավորումն ընտրելու մասին քննիչի միջնորդությունը։ Տեղեկությունը «Փաստինֆո»-ի հետ զրույցում հայտնեց Հակակոռուպցիոն դատարանի մամուլի խոսնակ Մերի Գևորգյանը։

Լրատվամիջոցն ավելի վաղ հայտնել էր, քաղաքապետարանում կոռուպցիոն հերթական սկանդալն է հասունանում։ Իրավապահները երեկ ՀԿԿ-ում քննվող քրեական վարույթի շրջանակներում խուզարկություններ են իրականացրել քաղաքապետարանի աշխատակազմի Ճարտարապետության և քաղաքաշինության վարչությունում։ Խուզարկությանը հաջորդել է ձերբակալությունները։ Քրեական վարույթով ձերբակալվել է 5 անձ, այդ թվում՝ Երևանի քաղաքապետարանի աշխատակազմի ճարտարապետության և քաղաքաշինության վարչության քաղաքաշինական փաստաթղթերի ձևակերպման 2-րդ բաժնի գլխավոր մասնագետ Քնարիկ Պետրոսյանը։ Նրան մեղադրանք է ներկայացվել կաշառք ստանալու հատկանիշներով։

Ձերբակալված անձանցից երեքի նկատմամբ կալանավորումը որպես խափանման միջոց ընտրելու մասին միջնորդություն է ներկայացվել Հակակոռուպցիոն դատարան, որոնցից բավարարվել է երկուսը։ Մասնավորապես, կալանավորվել են Քնարիկ Պետրոսյանը և «Արխիթուլս» ՍՊԸ-ում որպես ճարտարապետ աշխատող, նախկինում Երևան քաղաքի Շենգավիթ վարչական շրջանի ղեկավարի աշխատակազմի քաղաքաշինության և հողօգտագործման բաժնի գլխավոր մասնագետ Շահեն Պետրոսյանը։

Հիշեցնենք՝ ավելի վաղ հաղորդել էինք, որ Երեւանի քաղաքապետարանում կատարված խուզարկությունների արդյունքում կան ձերբակալվածներ։ Իրավապահները խուզարկություններ էին կատարել Երեւանի քաղաքապետարանի աշխատակազմի ճարտարապետության և քաղաքաշինության վարչությունում։ Հայտնել էինք, որ քաղաքապետարանի պաշտոնյային կաշառք ստանալու մեղադրանք է ներկայացվել։