Հայիթիի վարչապետը հրաժարական է տվել
Հայիթիի վարչապետ Արիել Հենրին հրաժարական է տվել։ Այս մասին հաղորդում է Reuters-ը՝ վկայակոչելով Գայանայի նախագահ Իրֆան Ալիին և ամերիկացի բարձրաստիճան պաշտոնյային: Այսպիսով, նա լքում է պաշտոնը, որը զբաղեցնում էր 2021 թվականին երկրի նախորդ նախագահի սպանությունից հետո։
«Մենք ճանաչում ենք նրա հրաժարականը անցումային նախագահական խորհրդի ստեղծումից և ժամանակավոր վարչապետի նշանակումից հետո»,-ասել է Ալին, ով նաև Կարիբյան համայնքի նախագահն է՝ շնորհակալություն հայտնելով Անրիին Հայիթիի ծառայության համար: Ամերիկացի բարձրաստիճան պաշտոնյան հայտնել է, որ Անրին մնում է Պուերտո Ռիկոյում, և որ նրա հրաժարականի մասին որոշումը կայացվել է դեռ ուրբաթ օրը: Անրին ցանկություն է հայտնել ապագայում վերադառնալ Հայիթի, հայտնել է պաշտոնյան:
Վարչապետի հրաժարականը տեղի է ունեցել այն բանից հետո, երբ տարածաշրջանային առաջնորդները երկուշաբթի օրը հանդիպել են հարեւան Ջամայկայում՝ քննարկելու քաղաքական անցման շրջանակը, որն ԱՄՆ-ն անցյալ շաբաթ կոչ էր արել «արագացնել» նախագահական խորհրդի ստեղծմամբ: Ալին ասել է, որ նախագահական խորհուրդը կներառի երկու դիտորդ և յոթ քվեարկելու իրավունք ունեցող անդամ, այդ թվում՝ մի քանի կոալիցիաների, մասնավոր հատվածի, քաղաքացիական հասարակության և մեկ կրոնական առաջնորդի ներկայացուցիչներ:
Փետրվարի վերջին Անրին ուղևորվեց Քենիա՝ ապահովելու ՄԱԿ-ի կողմից աջակցվող անվտանգության միջազգային առաքելության ղեկավարումը՝ օգնելու ոստիկանությանը պայքարել Հայիթիում զինված խմբավորումների դեմ: Այնուամենայնիվ, մայրաքաղաք Պորտ-օ-Պրենսում բռնության կտրուկ սրումը նրա բացակայության ընթացքում հանգեցրեց նրան, որ նա մնաց Պուերտո Ռիկոյում:
Հաիթիի ավազակախմբերը՝ «խորոված» մականունով նախկին գնդապետ Շերիզիեի գլխավորությամբ, փետրվարի 29-ին հարձակում են սկսել կառավարությանը տապալելու համար՝ գրոհելով և թալանելով ոստիկանական բաժանմունքները, բանտերն ու հիվանդանոցները, ինչպես նաև պաշարելով ռազմավարական օբյեկտները, ներառյալ նավահանգիստը և օդանավակայանը: Անցյալ շաբաթ ԱՄՆ-ի պաշտոնական ներկայացուցիչը նախազգուշացրեց, որ Անրիի ոչ պոպուլյար կառավարությունը կարող է ընկնել «ցանկացած պահի»:
