Չի բացառվում, որ ՀՀ–ում ԵՄ դիտորդների առաքելության մանդատը երկարաձգվի ևս 2 տարով. Փաշինյան
Չի բացառվում, որ ՀՀ–ում ԵՄ դիտորդների առաքելության մանդատը երկարաձգվի ևս 2 տարով։ Այս մասին այսօր մամուլի ասուլիսի ժամանակ ասաց ՀՀ վարչապետ Նիկոլ Փաշինյանը` անդրադառնալով հարցին, թե ԵՄ անդամակցության հետ կապված ինչ հեռանկարներ կան, ու որքանով են ՀՀ իշխանությունները ցանկանում դառնալ ԵՄ անդամ։
Փաշինյանը հիշեցրեց Եվրախորհրդարանում իր արած այն հայտարարությունը, որ ՀՀ–ն պատրաստ է ԵՄ–ին լինել այնքան մոտ, որքան ԵՄ–ն հնարավոր կհամարի։
«Սա ասվել է, հիմա մենք պետք է հասկանանք` ԵՄ–ն ինչքա՞ն մոտ կհամարի ու դրանից հետո միայն կանենք հետևություններ։ Այս փուլում մենք տեսնում ենք, որ ԵՄ–ի հետ մեր հարաբերությունները շատ ակտիվ են, և լավ է, որ ԵՄ–ն է ասում, որ ՀՀ–ի հետ հարաբերությունները երբեք այսքան խորը և ամուր չեն եղել»,– ասաց Փաշինյանը։
Նա հույս ունի, որ առաջիկայում կլինեն մի շարք որոշումներ, որոնք ԵՄ–ի հետ այդ ուժեղ հարաբերությունների արտահայտումը կլինեն։ Ըստ ՀՀ վարչապետի` այդ արտահայտումներից մեկը կարող է լինել վիզաների ազատականացման բանակցությունների մեկնարկը ՀՀ–ի և ԵՄ–ի միջև։
«Հաջորդը կարող է լինել ԵՄ–ի հետ առևտրային արտոնյալ պայմանների տրամադրումը ՀՀ–ում արտադրված ապրանքներին, ինչպես նաև ՀՀ–ի հետ տնտեսական կապերի խորացման ուղղությամբ արտոնությունները»,– ասաց Փաշինյանը։
Ըստ նրա` ԵՄ–ի հետ ՀՀ–ն ունի լայն օրակարգ, ու մեր երկիրը պատրաստ է այն ավելի խորացնել ու ընդլայնել։
