Բանակցությունները կարող են հնարավորինս կարճ ժամկետներում ավարտվել․ Իրանի ԱԳՆ
Իրանի ԱԳՆ պաշտոնական ներկայացուցիչ Նասեր Քանանին հայտարարել է, որ Իսլամական Հանրապետությունը պատրաստ է նստել բանակցությունների սեղանի շուրջ՝ քննարկելու միջուկային ծրագրի վերաբերյալ գործողությունների համատեղ համապարփակ ծրագրի վերականգնումը:
«Ինչ վերաբերում է պատժամիջոցների վերացման քննարկումներին, մենք հավատարիմ ենք երկխոսությանը եւ համոզված ենք, որ հակառակ կողմի անհրաժեշտ եւ համապատասխան ցանկության դեպքում բանակցությունները կարող են հնարավորինս կարճ ժամկետներում ավարտվել», - հայտարարել է Քաանին մամուլի ասուլիսի ժամանակ՝ մեկնաբանելով Իրանի ԱԳ փոխնախարար Ալի Բաղերի կանի եւ միջուկային գործարքի հարցով Եվրամիության համակարգող Էնրիկե Մորայի հանդիպումներն ու խորհրդակցությունները:
2015 թվականին ՄԱԿ-ի Անվտանգության խորհրդի մշտական անդամների «հնգյակը» և Գերմանիան Իրանի հետ ստորագրել են Գործողությունների համատեղ համապարփակ ծրագիր (ՀԳՀԾ), որն ուղղված է Թեհրանի միջուկային մշակումների շուրջ ճգնաժամի հաղթահարմանը: ԱՄՆ-ի նախորդ նախագահ Դոնալդ Թրամփը 2018 թվականին որոշում էր կայացրել այդ պայմանավորվածությունից դուրս գալու մասին: ԱՄՆ նախագահ Ջո Բայդենը բազմիցս ազդարարել է Վաշինգտոնը միջուկային գործարքին վերադարձնելու պատրաստակամության մասին:
Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ն և Ֆրանսիան 2021 թվականի ապրիլից Վիեննայում բանակցություններ են վարում Իրանի հետ ԳՀՀԾ-ն իր սկզբնական տեսքով վերականգնելու շուրջ։ 2022 թվականի նոյեմբերի 10-ին Ատոմային Էներգիայի միջազգային գործակալության գլխավոր տնօրեն Ռաֆայել Գրոսին հայտարարել է, որ Վիեննայում Իսլամական Հանրապետության ներկայացուցիչների հետ բանակցությունների հերթական փուլն ավարտվել է առանց որևէ արդյունքի։
