Վաղարշակ Հակոբյանը՝ Հայաստանի կողմից ՌԴ-ի դեմ ուղղված քայլեր անելու մասին
Ցանկացած հայտարարություն, որը միտված է Հայաստանի անվտանգության եւ անվտանգության երաշխիքների բարձրացմանը, իհարկե, գոտեպնդում է, եւ կապ չունի, թե դա որ երկիրն է: Այս մասին այսօր ԱԺ-ում լրագրողների հետ զրույցում հայտարարեց Տարածաշրջանային և եվրասիական ինտեգրման հարցերի հանձնաժողովի փոխնախագահ, ՔՊ խմբակցության պատգամավոր Վաղարշակ Հակոբյանը՝ անդրադառնալով Մեծ Բրիտանիայի զինված ուժերի նախարար Ջեյմս Հիփիի հայտարարությանը, թե Մեծ Բրիտանիան կաջակցի Հայաստանին Ռուսաստանի պատասխան սպառնալիքների դեպքում:
«Տեղի է ունեցել հայտարարություն, որ մենք սառեցրել ենք մեր անդամակցությունը ՀԱՊԿ-ին, իրականում մենք լուրջ գործողություններ ենք իրականացնում Հայաստանի անվտանգության երաշխիքների բարձրացման, ռազմական տեխնիկայի ձեռքբերման առումով: Ես կուզենամ, որ հարցին նայենք այդ կոնտեքստում: Մենք պետք է արձանագրենք, որ ՀՀ-ն ինքնիշխան երկիր է եւ կարող է ոչ միայն տնտեսական համագործակցության շրջանակում այլ շուկաներ փնտրել, այլ գործընկերների հետ համագործակցել, այլ նաեւ ռազմական: Փաստը ցույց է տվել, որ մենք եղել ենք ռազմական դաշինքի անդամ, որը չի գործել այն արդյունավետությամբ, որը մենք ակնկալելե ենք: Իհարկե, մենք պետք է բոլոր հնարավորությունները օգհտագործենք Հայաստանի անվտանգության հետ կապված»,-ասաց ՔՊ-ական պատգամավորը:
Հնչող գնահատականներին, որ Հայաստանն ուզում են դարձնել «Ուկրաինա 2», նա ասաց. «Ես չեմ ուզում, որ մենք նման գնահատական տանք երկու պտճռով: Առաջինը, ՀՀ բոլոր քայլերն ուղղված են անվտանգության բարձրացմանը: Երկրորդը, բացարձակապես տեղին չեմ համարում նման նույնացումները: Երրորդը, Հայաստանը համարվում է ԵԱՏՄ անդամ, ՀՀ-ում կա ռուսական ռազմաբազա: Մյուս կողմից մենք ունենք համագորակցություն Ֆրանսիայի հետ, Եվրոպայի հետ: Ցանկացած միջազգային գործընկեր, որը Հայաստանի անվտանգության բարձրացմանը միտված որեւէ քայլ, հայտարարություն, գործողություն կիրականացնի, մենք դա գոհունակությամբ եւ շատ լավ կընկալենք ու կընդունենք»:
Հարցին՝ անգամ եթե դա ընդդեմ Ռուսաստանի՞ է, նա պատասխանեց. «Ի՞նչ է նշանակում՝ թեկուզ ընդդեմ Ռուսաստանի: Հայաստանը ընդդեմ որեւէ մի երկրի, այդ թվում Ռուսաստանի ոչինչ չի անում: Մենք մինչեւ հիմա Ռուսաստանի հետ դաշնակից ենք եւ միեւնույն տնտեսական բլոկում ենք: Այն գնահատականը, որ մեր ինչ-որ քայլ ուղղված է ՌԴ-ի դեմ, սադրանքներ են եւ իրականության հետ որեւէ կապ չունեն: Մենք աշխատում ենք ի նպաստ Հայաստանի, եւ եթե նման աշխատանքը որեւէ տեղ կարող է ընկալվել ինչ-որ մեկի դեմ, ես սա քաղաքական իրավիճակի ոչ պատշաճ գնահատում եմ համարում, շատ սխալ մեկնաբանություն եմ համարում: Նման բան չկա»:
