Իսրայելը Եգիպտոսին է փոխանցել այն մարդկանց ցուցակը, ովքեր ազատ չեն արձակվի փոխանակման գործարքի շրջանակներում
Իսրայելի ներկայացուցիչները եգիպտական կողմին, որը Գազայի կարգավորման բանակցություններում միջնորդներից մեկն է, փոխանցել են պաղեստինցի բանտարկյալների ցուցակը, որոնք չեն ազատվի իսրայելական բանտերից՝ որպես պատանդների փոխանակման հնարավոր պայմանավորվածությունների մաս։ Այս մասին հայտնում է Sky News – Arabiya-ն։
Լրատվամիջոցի տեղեկություններով՝ Իսրայելը եգիպտացի միջնորդներին տրամադրել է պաղեստինցի բանտարկյալների անունների ցուցակը, որոնք չեն ազատվի, եթե անգամ կողմերը հավանություն տան պատանդների փոխանակման գործարքին։
Գազայի կարգավորման շուրջ բանակցությունների ընթացքում պաղեստինյան ՀԱՄԱՍ շարժումն ի սկզբանե համաձայնել էր պատանդների փոխանակմանը պաղեստինցի բանտարկյալների հետ՝ չպնդելով իր երկարամյա աջակիցներին ազատ արձակելու գործարքի առաջին փուլը:
Որոշ ժամանակ անց շարժումը վերանայել է իր դիրքորոշումը և պահանջել բանտից ազատ արձակել մի քանի հարյուր պաղեստինցիների, ովքեր երկարաժամկետ բանտարկություն էին կրում կամ դատապարտված էին ցմահ։
