ՏԵՍԱՆՅՈՒԹ. «Մի մեկնեք, բոլորին 300 հազար դրամով աշխատանք կտամ». Գեղարքունիքի մարզպետը` ակցիայի մասնակիցներին

Երևան-Մարտունի ճանապարհը փակած բնակիչների եւ այստեղ ժամանակ Գեղարքունիքի մարզպետ Կարեն Սարգսյանի միջեւ վիճաբանություն սկսվեց:

Կարեն Սարգսյանը բնակիչներին հորդորել է արտագնա աշխատանքի չմեկնեն և ինքը բոլորին կապահովի աշխատանքով. «Մի մեկնեք, բոլորին 300 հազար դրամով աշխատանք կտամ»։

«Հարց չկա։ Հաստա՞տ, բայց պետք է 10կմ շառավղով լինի, թե չէ ինձ ձեռք չի տա, ասենք, գնամ Սևան, Աբովյան՝ աշխատելու, էլ տակը բան չի մնա»,-նշեց բնակիչը։

«Ուրիշ, էլ ի՞նչ անենք։ Ես մարզում եմ աշխատանք տալիս։ Քո գործը չէ, ես եմ ապահովողը»,-արձագանքել է մարզպետը։

Բնակիչն էլ հայտարարել են, որ եթե այսպես շարունակվի, ինքը Հայաստանից գնալու է։

«Դու մեր երկիրը չես սիրում։ Իրականում ինչքան եք սիրում սուտ ու անիմաստ խոսել»,-նշել է մարզպետը։

Ակցիայի մասնակիցներից մեկը մարզպետին եւ իշխանություններին մեղադրեց երկիրը ծախելու մեջ, ինչին մարզպետն արձագանքեց. «Խելոք խոսա, սովորացրած էդպես ոգեւորվում ես»:

Քանի որ ամեն մեկը մի բան էր ասում, եւ խոսակցություն չէր ստացվում, մարզպետ Կարեն Սարգսյանն ասաց. «Այսպես չեղավ, սենց չենք խոսում իրար հետ: Մոտեցեք այնտեղ, բարձրանանք, խոսենք»:

Այդ ասելով մարզպետը մարդկանց սուլոցների ներքո հեռացավ:

Նշենք, որ Գեղարքունիքի մարզի բնակիչները փակել են Երեւան-Մարտունի ճանապարհը. նրանք բողոքում են ՊԵԿ-ի նոր օրենսդրական փոփոխությունների դեմ, ըստ որի արտագնա աշխատանքի մեկնողները այլ պետություններում ստացված եկամուտից պետք է 20 տոկոս եկամտային հարկ վճարեն Հայաստանում: Այսօր ՊԵԿ-ը հաղորդագրություն է տարածել՝ նշելով, որ պատրաստ է այս օրենսդրական կարգավորման շուրջ քննարկումներ սկսել: