Չիպավորված մարդը կարողանում է մտքի ուժով շարժել համակարգչային մկնիկը. Մասկ
Առաջին մարդը, որի ուղեղում ներդրվել է Neuralink ընկերության չիպը, կարծես թե լիովին ապաքինվել է և ի վիճակի է կառավարել համակարգչային մկնիկը` օգտագործելով իր միտքը: Այս մասին, Reuters-ի փոխանցմամբ, երկուշաբթի ուշ երեկոյան հայտարարել է Neuralink-ի հիմնադիր Իլոն Մասկը:
«Լավ առաջընթացը կա, և հիվանդը, կարծես, լիովին ապաքինվել է... Հիվանդը կարողանում է մկնիկն էկրանի շուրջ շարժել՝ պարզապես մտածելով»,- ասել է Մասկը Spaces միջոցառման ժամանակ:
Մասկը մանրամասնել է, որ Neuralink-ն այժմ փորձում է այնպես անել, որ հիվանդը հնարավորինս շատ կարողանա սեղմել մկնիկի կոճակը:
Հիշեցնենք, որ Neuralink նեյրոտեխնոլոգիական ընկերությունը հունվարի 28-ին առաջին անգամ նեյրոչիպ է ներդրել մարդու ուղեղում։ Այն նախատեսված է մտքերի միջոցով տարբեր սարքեր օգտագործելու համար:
