«Մենք՝ եվրոպացիներս, այնքան ուժեղ չենք, որ ռուսները մեզ լուրջ ընդունեն». Օրբան

Եվրամիությունն այնքան ուժեղ չէ, որ Ռուսաստանը լուրջ վերաբերվի դրան։ Այս մասին Հունգարիայի վարչապետ Վիկտոր Օրբանը հայտարարել է Ավստրիայի նախկին կանցլեր Վոլֆգանգ Շյուսելի հետ զրույցում։ Տեղեկատվությունը փոխանցում է ՏԱՍՍ-ը:

«Խոսքը վստահության մասին չէ, մեր խնդիրը ուժի բացակայությունն է։ Մենք՝ եվրոպացիներս, այնքան ուժեղ չենք, որ ռուսները մեզ լուրջ ընդունեն։ Սա խաղ է իշխանության շուրջ», - Օրբանի խոսքը մեջբերում է Die Presse թերթը։

Նրա կարծիքով՝ Եվրամիությունը պետք է ուժ ցուցաբերի և Ռուսաստանին հստակ հասկացնի, որ ինքը գիտակցում է երկու կողմերի շահերի առկայությունը։

«Նման հիմքի վրա կարելի է համաձայնագրեր կնքել», - կարծում է վարչապետը։

«Ուկրաինան մեզ՝ եվրոպացիներիս, ոչ մի լրացուցիչ անվտանգություն չի տալիս, քանի որ մեզանից շատերն արդեն ՆԱՏՕ - ի անդամներ են, որը շատ ավելի ուժեղ է, քան Ռուսաստանը», - կարծում է Օրբանը և նշում՝ ոչ մի վտանգ չկա, որ Ռուսաստանը հարձակվի ՆԱՏՕ-ի անդամի վրա։