Սոնա Աղեկյանին ևս զրկեցին մանդատից
Երևանի ավագանու արտահերթ նիստում 34 կողմ, 0 դեմ ձայների հարաբերակցությամբ ավագանին «Մայր Հայաստան» խմբակցության անդամ Սոնա Աղեկյանին զրկեց մանդատից։
Քվեարկությունից առաջ նա իր ելույթում ասաց, որ բոլոր ժամանակներում եղել է ընդդիմադիր ու պայքարել է քաղաքացու շահերի համար, սակայն նախկինում ոչ մի իշխանություն նրան չի ցանկացել զրկել մանդատից՝ իրենց ուզածով չշարժվելու համար։
«Ավագանու անդամին մանդատից զրկելը թույլ իշխանության քայլ է, թույլ ու վախկոտ իշխանության։ Ես իմ պայքարը շարունակելու եմ ցանկացած կարգավիճակով»,– ասաց Աղեկյանը։
Երևանի փոխքաղաքապետ Սուրեն Գրիգորյանի խոսքով՝ որոշում է կայացվել Սոնա Աղեկյանին զրկել մանդատից ոչ թե բացակայությունների, այլ քվեարկություններին չմասնակցելու համար։
