Պուտինի այցը Թուրքիա հետաձգվել է
ՌԴ նախագահ Վլադիմիր Պուտինի այցը Թուրքիա, որը նախատեսված էր փետրվարի 12-ին, հետաձգվել է։ Այս մասին X (Twitter) սոցիալական ցանցում հայտնել է Hürriyet թերթի լրագրող Հանդե Ֆիրաթը։
«Պուտինի այցը հետաձգվել է: Պատճառը երկու երկրներում ընտրությունների ժամանակացույցն է և աշխատանքային պարտավորությունները»,- ասել է նա:
ՌԴ նախագահի մամուլի քարտուղար Դմիտրի Պեսկովը ավելի վաղ հայտնել էր, որ Պուտինի և նրա թուրք գործընկեր Ռեջեփ Էրդողանի միջև բանակցությունների նախապատրաստումը շարունակվում է։ Կրեմլի խոսնակը չի հաստատել ՌԴ ղեկավարի այցի հետաձգման մասին տեղեկությունը։
«Ժամկետներ չեն հայտարարվել, մենք շարունակում ենք պատրաստվել ամենաբարձր մակարդակով շփումներին, ժամկետները կհամաձայնեցվեն»,- նշել է նա։
Ավելի վաղ Պեսկովը հայտնել էր, որ Պուտինի այցը Թուրքիա նախատեսված է մինչև մարտի 15-ից 17-ը կայանալիք Ռուսաստանում նախագահական ընտրությունները։ Լրատվամիջոցները ամսաթիվ նշել են փետրվարի 12-ը, սակայն տեղեկությունը պաշտոնապես չի հաստատվել։
