Պուտինը կմեկնի Թուրքիա. հայտնի է, թե ինչ է քննարկվելու
Թուրքիան ՌԴ նախագահ Վլադիմիր Պուտինի՝ երկիր ծրագրված այցի ընթացքում ակնկալում է քննարկել գազի հարցը, «Աքքույու» ատոմակայանի նախագիծը, այն, ինչ կատարվում է Սիրիայում և իրավիճակը Գազայի հատվածում։ Այս մասին A Haber-ին տված հարցազրույցում հայտարարել է Թուրքիայի արտգործնախարար Հաքան Ֆիդանը։
Նրա խոսքով՝ Ռուսաստանի դիրքորոշումը Գազայի հատվածում ՀԱՄԱՍ–ի հետ Իսրայելի պատերազմի վերաբերյալ մոտ է Թուրքիայի դիրքորոշմանը։
«Ռուսաստանի դիրքորոշումը նույնն է, ինչ մերը՝ հումանիտար օգնության մատակարարման, պատերազմի շուտափույթ դադարեցման և երկու պետությունների խնդրի լուծման հարցում»,- ասել է Ֆիդանը։
Թուրք նախարարի խոսքով՝ Պուտինն ու Թուրքիայի նախագահ Ռեջեփ Թայիփ Էրդողանը նաև «անպայման» կքննարկեն Ուկրաինայի հետ հացահատիկի գործարքը։ Նա պնդում է, թե Թուրքիայի ղեկավարը «մեծ նշանակություն» է տալիս այս հարցին։
