Նա մեր հայրն է, բայց ընդհանրապես կապ չունի մեր բիզնեսների զարգացման հետ. Գագիկ Խաչատրյանի որդի
Մեր բոլոր բիզնեսները ստեղծվել են զրոյից, ՊԵԿ նախկին նախագահ Գագիկ Խաչատրյանն այդ հարցում չի միջամտել: Այս մասին «Արհեստական բանականությունը բիզնեսի համար» խորագրով համաժողովի ժամանակ լրագրողների հետ զրույցում նշել է ՀՀ ՊԵԿ նախկին նախագահ Գագիկ Խաչատրյանի որդի, գործարար Արտյոմ Խաչատրյանը` անդրադառնալով «Գալաքսի» ընկերությունների խմբի բիզնեսներին:
Լրագրողներից մեկը հետաքրքրվել է, թե արդյոք իրենք Գագիկ Խաչատրյանի պաշտոնական դիրքով պայմանավորված բիզնեսների առաջխաղացում են ունեցել:
«Գագիկ Խաչատրյանը չէր կարող 250 միջազգային գործընկերների հետ խոսել: Նա մեր հայրն է, բայց ընդհանրապես կապ չունի մեր բիզնեսների զարգացման հետ»,–ասել է նա։
Հարցին, թե ինչ հարաբերություններ ունեն ներկայիս իշխանությունների հետ հաշվի առնելով նրանց ընտանիքի դեմ հարուցված քրեական գործը՝ Խաչատրյանը պատասխանեց. «Նորմալ»։
Հիշեցնենք, որ Գագիկ Խաչատրյանին մեղադրանք է առաջադրված միլիոնավոր դոլարների չարաշահման, կաշառք վերցնելու և փողերի լվացման համար։ Խոսքը 41 միլիոն դոլարի մասին է։
