ՄԱԿ-ի դատարանը մասամբ ճանաչել է Ռուսաստանի կողմից հակաահաբեկչական կոնվենցիայի խախտումը
Արդարադատության միջազգային դատարանը, Ուկրաինայի հայցի քննարկումից հետո, որոշեց, որ Ռուսաստանը մասամբ խախտել է ահաբեկչության ֆինանսավորումը ճնշելու և ռասայական խտրականության բոլոր ձևերի վերացման մասին ՄԱԿ-ի կոնվենցիաների կետերը։ Միաժամանակ դատարանը չի բավարարել Ուկրաինային փոխհատուցում վճարելու պահանջը։ Այս մասին գրում է Kommersant.ru-ն։
Դատարանի որոշմամբ՝ Ռուսաստանը խախտել է ահաբեկչության ֆինանսավորման դեմ պայքարի կոնվենցիայի միայն մեկ դրույթ՝ չհետաքննելով 2014 թվականին Դոնբասի անջատողականներին ֆինանսական աջակցության ապացույցները: Հայցադիմումում նշված կոնվենցիայի այլ հոդվածներով դատարանը խախտումներ չի հայտնաբերել։
ՄԱԿ-ի դատարանը նաև ճանաչել է Ռուսաստանի կողմից Ռասայական խտրականության վերացման մասին կոնվենցիայի մասնակի խախտում, քանի որ Ղրիմում վերջին տարիներին ուկրաիներեն սովորողների թիվը նվազել է։ Որոշման համաձայն՝ դատարանը 2014 թվականից հետո Ղրիմի թաթարների և ուկրաինացիների նկատմամբ ռասայական խտրականության մեղադրանքների ապացույցներ չի գտել, որոնք վկայակոչվել են Ուկրաինայի հայցում։
