Ինչու են իրավապահները «մտել» Էկոնոմիկայի նախարարություն․ հարց՝ Վահան Քերոբյանին

Էկոնոմիկայի նախարար Վահան Քերոբյանը տեղյակ չէ՝ Ազգային անվտանգության ծառայությո՞ւնն է «մտել» նախարարություն, թե՞ ուրիշ կառույց։ Այսօր՝ հունվարի 31-ին, ԱԺ-ում լրագրողների հետ զրույցում նա ասել է․ «Ճիշտն ասած՝ չգիտեմ ԱԱԾ-ն է, թե չէ, ու չգիտեմ, թե ինչու է մտել»։ 

«Բնականաբար, պետական կառավարման մարմինները հիմնականում կարող են մտնել կոռուպցիոն գործերով եւ մենք գերկարևորում ենք կոռուպցիայի դեմ պայքարը: Բայց նաեւ պետք է նշեմ, որ հարգում ենք նաեւ մարդկանց անմեղության կանխավարկածը: նաեւ նշեմ, որ վերջին երեք տարվա մեջ էկոնոմիկայի նախարարության աշխտակիցների հետ կապված նման բաներ չի եղել»,- նշել է նա:

Լրագրողների դիտարկմանը, որ փոխնախարար Անի Իսպիրյանի ազատումը համընկե՞լ է այս գործողությունների հետ՝ նախարարն արձագանքեց, թե դա ընդամենը պատահականություն է. «Անին 1,5 ամիս առաջ ասել էր, որ ամուսինը Հոլանդիայում աշխատանք է ստացել, պատրաստվում են տեղափոխվել եւ տեղափոխվելուց ի քանի օր առաջ դիմում է գրել ։ Ուրիշ հարց տվեք էլի»,- ասել է նա և խնդրել այդ թեմայով իրեն հարց չտալ:

«Ես այստեղ էի եւ դեռեւս որեւէ նորություն չունեմ, կարծում եմ՝ նորությունների համար ճիշտ կլինի դիմելայն մարմիններին, որոնք իրականացնում են քննչական գործողությունները»,-նշել է Քերոբյանը:

Հիշեցնենք՝ ավելի վաղ հայտնել էինք, որ ըստ մամուլի տեղեկությունների՝ էկոնոմիկայի նախարարի տեղակալի պաշտոնից ազատված Անի Իսպիրյանը ձերբակալվել է ԱԱԾ կողմից։ Հաղորդվում է, որ ձերբակալվել է նաև Էկոնոմիկայի նախարարության հանրային ներդրումների վարչության պետը։