Բալթյան երկրները ՌԴ-ի հետ սահմանին պաշտպանական գիծ կստեղծեն

Էստոնիան, Լատվիան և Լիտվան համաձայնության են եկել Ռուսաստանի հետ սահմանին «պաշտպանական գիծ» ստեղծելու վերաբերյալ։ Այս մասին հայտնում է Էստոնիայի պաշտպանության նախարարությունը: Տեղեկատվությունը փոխանցում է ՏԱՍՍ-ը:

«Բալթյան երկրները պայմանավորվել են արեւելյան սահմանի երկայնքով պաշտպանության Բալթյան գիծ ստեղծել։ Չափազանց կարեւոր է ժամանակը խելամտորեն օգտագործել պաշտպանության պատրաստվածությունը բարձրացնելու համար», - ասված է X-ում գերատեսչության էջում զետեղված հաղորդագրության մեջ։

Էստոնիայի պաշտպանության նախարարությունը ճշտել է, որ այդ գծի ստեղծման մասին համաձայնագիրը ստորագրվել է ուրբաթ օրը Ռիգայում երեք հանրապետությունների պաշտպանական գերատեսչությունների ղեկավարների կողմից: Նշվում է, որ տարբեր պաշտպանական կառույցներից բաղկացած պաշտպանական գոտու ստեղծման նպատակը կլինի զսպումը և անհրաժեշտության դեպքում պաշտպանությունը ռազմական սպառնալիքից:

Իր հերթին Էստոնական Postimees թերթը հայտնել է, որ Էստոնիայի իշխանությունները արևելյան սահմանին մոտ 600 բունկեր կկառուցեն ՝ ՌԴ-ի կողմից հնարավոր սպառնալիքից պաշտպանվելու համար: Դրանք անհրաժեշտ են, որպեսզի անհրաժեշտության դեպքում պաշտպանեն Էստոնիայի տարածքը, նշում է պարբերականը ՝ վկայակոչելով պաշտպանության նախարարության փոխկանցլերի խորհրդական Կայդո Տիյտուսին։

«Ռուսաստանը կա և կլինի Էստոնիայի անվտանգության ամենամեծ սպառնալիքը», - պնդել է նա:

Բունկերների ճշգրիտ թիվը, որոնք կկառուցվեն, կորոշվի աշխատանքների ընթացքում, նշում է պարբերականը և հավելում, որ դրանց տեղակայման վայրերի մասին որոշումը կընդունվի մինչեւ այս տարվա վերջ, կառույցների տեղադրումը կսկսվի 2025 թվականի առաջին կեսին։