ՄԱԿ-ի գլխավոր քարտուղար Անտոնիո Գուտերեշը մտահոգություն է հայտնել Լիբանանի հետ Իսրայելի սահմանին իրավիճակի հնարավոր սրման կապակցությամբ և զգուշացրել, որ իսրայելա-լիբանանյան հակամարտությունը կարող է սպառնալ ողջ Մերձավոր Արևելքի տարածաշրջանի խաղաղությանը և կայունությանը:

«Դա (Իսրայելի և Լիբանանի միջև հարվածների փոխանակումը) կարող է հրահրել Իսրայելի և Լիբանանի միջև իրավիճակի ավելի լայն սրացում և լրջորեն ազդել տարածաշրջանային կայունության վրա», - ասվում է Գուտերեշի հայտարարության մեջ, որը հրապարակվել է ՄԱԿ-ի կայքում։

«Իմ պարտքն է այս պարզ և ուղիղ ուղերձը փոխանցել բոլոր կողմերին՝ դադարեցնել կրակի հետ խաղալը «կապույտ գծի» երկայնքով, նվազեցնել լարվածությունը և դադարեցնել ռազմական գործողությունները», - ասել է նա:

«Մենք չենք կարող թույլ տալ Լիբանանում այն, ինչ տեսնում ենք Գազայում, և մենք չենք կարող թույլ տալ այն, ինչ կատարվում է Գազայի հատվածում», - ընդգծել է Գուտերեշը:

ՄԱԿ-ի գլխավոր քարտուղարը նաև կոչ է արել «անհապաղ մարդասիրական հրադադար» հաստատել Գազայի հատվածում, որպեսզի թույլ տա օգնություն հասցնել անկլավին և «հեշտացնել պատանդների ազատումը»:

ՀԱՄԱՍ շարժումը հարձակվել է Իսրայելի վրա 2023 թվականի հոկտեմբերի 7-ին։ Ի պատասխան՝ Իսրայելը ռազմական գործողություն սկսեց Գազայի հատվածում։ Լիբանանյան  «Հեզբոլլահ» շարժումն իր հերթին պարբերաբար հարձակումներ է իրականացնում Իսրայելի տարածքի վրա՝ Գազայի պաղեստինցիներին համերաշխություն հայտնելու համար։ Այնուամենայնիվ, «Հեզբոլլահը» խուսափել է լայնածավալ ռազմական գործողություններից։ Իսրայելն իր հերթին պատասխանում է  խմբավորման հարձակումներին, սակայն առայժմ ձեռնպահ է մնում նաև ինտենսիվ մարտերից՝ իր ուշադրությունը կենտրոնացնելով ոչ թե Լիբանանի հետ սահմանին, այլ Գազայի կռիվներին։