ՏԵՍԱՆՅՈՒԹ. Քանի ՃՏՊ է տեղի ունեցել 1 տարում ճանապարհը սխալ տեղով անցնելու հետևանքով
Մի քանի վայրկյան շուտ տեղ հասնելու համար չարժե ճանապարհն անցնել չթույլատրվող հատվածով՝ վտանգելով կյանքը, նաև անհարմարություն ստեղծելով երթևեկության մյուս մասնակիցների համար: Այս մասին ասվում է Ոստիկանության տարածած հաղորդագրության մեջ:
«Ըստ վիճակագրության` նախորդ տարվա ընթացքում հետիոտների՝ ոչ սահմանված հատվածով անցնելու հետևանքով արձանագրվել է 1193 ճանապարհատրանսպորտային պատահար։ Վրաերթի ենթարկվածներից 108-ը մահացել են, իսկ 1158-ը՝ վիրավորվել։
Ավելին, այս տարվա հունվարի 8-ից 10-ը, ընդամենը երեք օրվա ընթացքում, հանրապետությունում իրականացված ուժեղացված ծառայության ընթացքում պարեկները կազմել են հետիոտնի՝ ոչ սահմանված վայրով անցնելու վերաբերյալ 2194 արձանագրություն»,-նշվում է հայտարարությունում։
Երթևեկության հարգելի՛ մասնակիցներ՝ վարորդներ և հետիոտներ, ձեր իսկ անվտանգությունից ելնելով՝ պահպանեք ճանապարհային երթևեկության կանոնները։ Ճանապարհը հատեք բացառապես հետիոտնային անցումներով՝ պահպանելով ձեր կյանքն ու առողջությունը։
