Ձերբակալվել են հարյուրավոր մարդիկ․ իրավիճակն՝ Էկվադորում

Էկվադորի զինված ուժերն ու ազգային ոստիկանությունը երկրում անկարգությունների սկսվելուց հետո ձերբակալել են 329 ենթադրյալ հանցագործների եւ ուժեղացված ստոիգումների ընթացքում ոչնչացրել 5 մարդու: Այս մասին հայտնել է երկրի զինված ուժերի միացյալ հրամանատարության ղեկավար Խայմե Վելա Էրասոն: Տեղեկությունը փոխանցում է ՌԻԱ Նովոստին։

«Մենք գրավել ենք տարբեր տրամաչափի 61 միավոր զենք, 418 փամփուշտ, 24 պայթուցիկ սարք, ձերբակալել ենք 329 ահաբեկչի։ Գերությունից փրկվել է 41 մարդ։ Մենք ոչնչացրել ենք 5 ահաբեկչի»,-ասել է Վելան մամուլի ասուլիսի ժամանակ, որի տեսագրությունը հրապարակել Է La Voz del Tomebamba պարբերականը։

Նրա խոսքով՝ զինծառայողներն ու ոստիկանությունը երեք անգամ ստիպված են եղել առճակատման մեջ մտնել երեք զինված խմբերի հետ, հաջողվել է գրավել 28 փախստական բանտարկյալների:

Նախագահ Դանիել Նոբոան հունվարի 8-ին 60 օրով արտակարգ դրության ռեժիմ էր սահմանել, որպեսզի գործի դնի զինված ուժերը քրեակատարողական համակարգի վերահսկողությունը վերականգնելու համար, որի 139 աշխատակիցներ պատանդ են մնացել:

Դրանից հետո մի շարք քաղաքներում անկարգություններ են սկսվել։ Հունվարի 9-ի գիշերը հանցագործները սկսել են այրել մեքենաներ եւ ավտոբուսներ, Գուայակիլում պայթեցրել են ռումբեր, ավազակները ժամանակավորապես գրավել են տեղի հեռուստաալիքի ստուդիան: Ոստիկանությունը հայտնել է, որ անհայտ անձինք մեկ օրում յոթ իրավապահների են առեւանգել մայրաքաղաք Կիտոյում եւ Մաչալա քաղաքում: Մաչալայից երեք սպաների հաջողվել է ազատ արձակել։

Դրանից հետո Նոբոան հայտարարեց ներքին զինված հակամարտության մասին և բանակին հրամայեց չեզոքացնել տասնյակ հազարավոր մասնակիցների թվով 22 հանցավոր խմբավորումներ: Միացյալ հրամանատարության ղեկավար Վելա Էրասոն այդ հանցավոր խմբավորումներին հայտարարել է ռազմական թիրախներ և հայտարարել, որ նրանց հետ բանակցություններ չեն լինի:

Էկվադորի ներկայիս ղեկավարը իշխանության է եկել հանցավորության դեմ պայքարի կարգախոսներով, որն ընդունել է սպառնալից մասշտաբներ: Միայն վերջին ընտրարշավի ընթացքում են սպանվել «Կառուցիր» քաղաքական շարժման նախագահի թեկնածու Ֆերնանդո Վիլյավիսենսիոն, ինչպես նաև Էկվադորի Էսմերալդաս նահանգում «Քաղաքացիական հեղափոխություն» քաղաքական շարժման առաջնորդ Պեդրո Բրիոնեսը: